विराटनगर। अर्थमन्त्री डा. प्रकाशशरण महतले सामाजिक सुरक्षाको दायित्व बढेका कारण पुँजीगत शीर्षकको बजेट कम विनियोजन भएको बताउनुभएको छ ।
२०८० असार ४ गते मोरङ व्यापार सङ्घको छ्यासट्ठिऔँ वार्षिक साधारणसभाको उद्घाटन गर्दै अर्थमन्त्री महतले यस्तो अभिव्यक्ति दिनुभएको हो ।
‘सामाजिक सुरक्षासँगै सार्वजनिक ऋणको साँवाब्याजको दायित्व बढेकाले पुँजीगत शीर्षकमा कम बजेट विनियोजन भयो’ उहाँले भन्नुभयो– ‘तर अर्थतन्त्र चलायमान बनाउन पुँजीगत खर्च बढाउनैपर्ने हुन्छ ।’
सरकारले आगामी आर्थिक वर्षका लागि पुँजीगत शीर्षकमा कुल बजेटको १७ दशमलव २५ प्रतिशत विनियोजन गरेको छ ।
अर्थमन्त्री डा महतले मौद्रिक नीति र अर्थनीतिमा सरकारले सुधार गर्दै जाने बताउनुभयो । उहाँले आगामी आवको बजेट कसैको दबाब र प्रभावमा नपरी बनाएकाले जनतामुखी भएकोसमेत दाबी गर्नुभयो ।
कार्यक्रममा पूर्वरक्षामन्त्री डा मीनेन्द्र रिजाल, विराटनगर महानगरपालिकाका प्रमुख नागेश कोइराला, मोरङ व्यापार सङ्घका अध्यक्ष नवीन रिजाल, नेपाल उद्योग वाणिज्य महासङ्घका पूर्व अध्यक्ष चण्डिराज ढकाल, महासङ्घका वरिष्ठ उपाध्यक्ष अञ्जन श्रेष्ठलगायतले मन्तव्य भनाइ राख्नुभएको थियो ।
