काठमाडौं । निर्वाचन आयोगले विदेशमा रहेका नेपालीलाई मतदानको अधिकार दिन मतदाता नामावली संकलनबारे छलफल सुरु गरेको छ ।
शुक्रबार आयोगले बोलाएको सर्वदलीय बैठकमा पाँचमध्ये एउटा एजेण्डा ‘विदेशमा रहेका नेपाली नागरिकको मतदाता नामावली संकलन सम्बन्धमा’ रहेको छ ।
विदेशमा रहेका नेपालीहरुले लामो समयदेखि आफू बसेकै स्थानबाट मतदानको व्यवस्था मिलाउन माग गर्दै संघर्ष गरिरहेका छन् । भारतमा मूल प्रवाह अखिल भारत नेपाली एकता समाज र अन्य देशहरुमा रहेका नेपाली एकता समाजले लगातार यो विषय उठाइरहेका छन् ।
स्वदेशमा राष्ट्रिय जनमोर्चाले सडक र सदनबाट विदेशका नेपालीलाई मतदानको व्यवस्था गर्न माग गरिरहेको छ ।
सर्वोच्च अदालतले समेत आदेश दिइसकेको यो विषयमा सरकार उदासिन रहँदै आएको छ । यद्यपी आगामी आर्थिक वर्षको सरकारको नीति तथा कार्यक्रममा भने समेटिएको छ ।
सरकारले बजेट भाषणबाट जिल्ला निर्वाचन कार्यालय खारेज गर्ने निर्णय गरेपछि आयोगले असन्तुष्टि जनाएको छ ।
आजको छलफलमा पाँच वटा एजेण्डामा छलफल हुने आयोगले जनाएको छ । आयोगका प्रवक्ता एवं सहसचिव शालिग्राम शर्मा पौडेलले भने, ‘आज हामी राजनीतिक दलहरूसँग पाँच एजेन्डामा छलफल गर्छौं ।’
उनका अनुसार छलफलका ती पाँच विषय हुन्–
१) निर्वाचन कार्यालयको खारेजी सम्बन्धमा
२) निर्वाचन कानुनको विधेयक सम्बन्धमा
३) स्थानीय तहसँगगको सहकार्यमा मतदाता नामावली संकलन सम्बन्धमा
४) विदेशमा रहेका नेपाली नागरिकको मतदाता नामावली संकलन सम्बन्धमा
र,
५) दलको लेखा तथा लेखापरीक्षण सम्बन्धमा।
यही जेठ १५ गते प्रस्तुत आगामी आर्थिक वर्षको बजेट भाषणमा सबै जिल्ला निर्वाचन कार्यालय खारेज गरिने उल्लेख गरिएको छ।
त्यतिबेलै प्रेस विज्ञप्ति जारी गरी उक्त निर्णयले संवैधानिक निकायको स्वतन्त्रता, स्वायत्तता र समक्षतामा गम्भीर प्रश्न उठ्न सक्ने भनेको निर्वाचन आयोगले आज यस विषयमा दलहरूसँग छलफल गर्न लागेको हो।
