काठमाडौं । संघीय संसद्को संयुक्त बैठक आज आइतबार) बस्दै छ । नयाँ बानेश्वरस्थित संसद भवनमा बिहान ११ बजे बैठक बस्न लागेको हो ।
संसद् सचिवालयका महासचिव डा. भरतराज गौतमका अनुसार बैठकमा नियमावली मस्यौदा समितिको प्रतिवेदनमाथि दफावार छलफल तथा पारित हुने छ ।
त्यसैगरी बैठकमा मस्यौदा समितिका सभापति ध्रुवबहादुर प्रधानले संघीय संसद्को बैठक र संयुक्त समिति (कार्यसञ्चालन) नियमावली २०८० को मस्यौदा प्रतिवेदनमाथिको संशोधनसहितको दफावार छलफल सदनमा गरियोस् भनी प्रस्ताव प्रस्तुत गर्ने सम्भावित कार्यसूची रहेको छ । उक्त मस्यौदा प्रतिवेदनमाथि प्राप्त संशोधनहरूलाई क्रमशः निर्णयार्थ प्रस्तुत गरिनेछ ।
आजै दिउँसो १ बजे संसद्को नियमित बैठक पनि बस्दैछ । सो बैठकमा अथ मन्त्री डा प्रकाशशरण महतले ‘आर्थिक वर्ष २०७९/०८० को आर्थिक सर्वेक्षण’ पेस गर्ने सम्भावित कार्यसूची रहेको छ ।
नीति तथा कार्यक्रम पारित
यसअघि सरकारले संसद्मा पेश गरेको आर्थिक वर्ष २०८०/०८१ को वार्षिक नीति तथा कार्यक्रम हिजो बहुमतले पारित भएको थियो। गत जेठ ५ गतेको संयुक्त बैठकमा राष्ट्रपति रामचन्द्र पौडेलले प्रस्तुत गरेको नीति तथा कार्यक्रम शनिबार पारित भएको हो।
छलफलको क्रममा उठेका प्रश्नको जवाफ प्रधानमन्त्री पुष्पकमल दाहालले दिएपछि नीति तथा कार्यक्रम बहुमतले पारित गरेको थियो ।
जेठ १५ गते अपराह्न ४ बजे संसदको दुवै सदनमा बजेट पेस हुँदैछ ।
