काठमाडौं । पाँचथरमा ट्रयाक्टरबाट खसेर दुई बालिकाको ज्यान गएको छ । दुर्घटनामा दुई जना घाइते भएका छन् ।

पाँचथरको हिलीहाङमा ट्याक्टर चढेर विद्यालय गइरहेका १३ वर्षीय पुजना सुवेदी र ९ वर्षीय गंगा सुवेदीको मृत्यु भएको हो।

जिल्ला प्रहरी कार्यालय पाँचथरका प्रहरी निरीक्षक दिवस कुवँरका अनुसार ड्राइभर सिटको छेउमा बसेका बालिका ट्रयाक्टरबाट झरेपछि ट्रयाक्टरले किचेको थियो । बालिकाको मृत्यु भएपछि चालक भाग्दा ट्रयाक्टर दुर्घटना भएको छ ।

त्यसक्रममा डालीमा बालुवामाथि बसेका दुई जना विद्यार्थी घाइते भएका छन्। घाइतेको पाँचथर जिल्ला अस्पतालमा उपचार भइरहेको छ ।

विद्यालय जाने क्रममा ट्रयाक्टरमा ११ जना विद्यार्थी चढेका थिए। तीब्र गतिका कारण विद्यार्थी ट्याक्टरबाट झरेको अनुमान गरिएको छ। ट्रयाक्टरका चालक तथा सहचलाक फरार रहेका छन्।