काठमाडौं । राष्ट्रिय जनमोर्चाका अध्यक्ष चित्रबहादुर केसीले फौजदारी मुद्दा लागेका सांसदलाई कारबाही गर्न माग गर्नुभएको छ ।
शुक्रबार प्रतिनिधि सभा बैठकमा बोल्दै सांसद केसीले लक्ष्मी महतो कोईरीलाई बिरामी भनेर चोख्याउन खोजिएको भन्दै आपत्ति जनाउनुभयो ।
‘मुद्दा लागेकोलाई बिरामी भनेर जोगाउन योभन्दा लज्जा केही हुँदैन । दूधको दूध पानीको पानी हुनुपर्छ । ज्यानमारालाई चोख्याउन मिल्दैन । कारबाही हुनुपर्छ,’ केसीले भन्नुभयो ।
प्रतिनिधिसभाको बैठकमा गृह मन्त्रालयको फरार अभियुक्तको सूचीमा रहेका सांसद कोइरीलाई सभामुख देवराज घिमिरेले ‘बिरामी’ भनेपछि बैठकमा तनाव भएको थियो ।
सभामुख घिमिरेले सांसद कोइरी बिरामी भएको भन्ने सूचना प्राप्त भएको भन्नासाथ सांसदहरूले सो विषय सचिवालयको रेकर्डबाट हटाउन माग गर्दै आसनबाट उभिएर विरोध गर्दा बैठक अवरुद्ध भयो ।
कांग्रेस सांसद रमेश लेखकले फरार अभियुक्तको सूचीमा रहेका सांसद कोइरीलाई बिरामी भन्न नहुने बताउँदै बिरामी भएको भन्ने विषय रेकर्डबाट हटाउन माग गर्नुभयो ।
यस्तै, रास्वपाका सांसद रवि लामिछानेले सांसद कोइरी फरार अभियुक्त भएको बताउँदै कोइरीलाई भारतीय प्रहरीले नियन्त्रणमा लिएको तस्बिर आफूसँग भएको दाबी गर्नुभयो ।
नेमकिपाका सांसद प्रेम सुवालले सो विषयबारेमा फरार सूचीमा रहेको अहिलेसम्म किन जानकारी नगराइएको भनी सदनको ध्यानाकर्षण गराउनुभयो ।
यसैगरी नेकपा एमालेका सांसद रघुजी पन्तले गृहमन्त्री हुने, सरकारमा रहने, फरार व्यक्तिलाई थुन्न नसक्ने अनि सदन अवरुद्ध गर्ने भन्दै आपत्ति प्रकट गर्नुभयो ।
माओवादी केन्द्रका सांसद हितराज पाण्डेले बिरामीको बहानामा रहेका फरार अभियुक्त कोइरीका बारेमा स्पष्ट रुलिङ गर्न आग्रह गर्नुभयो ।
बैठकमा सभामुख घिमिरेले सांसदले उठाएका विषयमा गम्भीर ध्यानाकर्षण भएको भन्दै सो विषयमा नेपालको संविधान, प्रचलित कानून र संसद् नियमावलीअनुसार हुने बताउनुभयो ।
