काठमाडौं । आगामी चैत दोस्रो साता बङ्गलादेशमा हुने भनिएको एशियन भलिबल कन्फडेरेसन (एभीसी) ‘सेन्ट्रल जोन पुरुष भलिबल प्रतियोगिता’ छ महिना पछाडी सरेको छ । सो प्रतियोगिता अब आगामी भदौ तेस्रो साता हुने भएको छ । आयोजक बङ्गलादेश भलिबल संघले कोरोना भाइरसका कारण खेलको मिति परिवर्तन गरेको बताइएको छ ।
प्रतियोगिताको समय परिवर्तन भए पछि हाल सञ्चालित बन्द प्रशिक्षण स्थगित गरिएको नेपाल भलिबल सङ्घका महासचिव जितेन्द्रबहादुर चन्दले जानकारी दिनुभयो । ‘हाललाई बन्द प्रशिक्षण स्थगित गरेका छौं, आर्थिक अवस्थाका कारण लामो समयसम्म प्रशिक्षण सञ्चालन गर्न सकिदैनौं, ।’ प्रतियोगिताको दुई महिना अघि पुनः बन्द प्रशिक्षणको आयोजना गरिने महासचिव चन्दले बताउनुभयो । संघले आइतबारदेखी सुरु हुने बन्द प्रशिक्षणका लागि १८ खेलाडीलाई बोलाएको थियो ।
संघले उक्त च्याम्पियनसिपका लागि हालै नेपालमा सम्पन्न १३ औँ दक्षिण एशियाली खेलकूद ९साग०मा खेलेका १३ खेलाडी तथा अन्य पाँच खेलाडीसहित प्रारम्भिक टोलीलाई बन्द प्रशिक्षणमा बोलाएको थियो । सेन्ट्रल जोन भलिबलका लागि ईम राना (कप्तान), विनोद चन्द, नरेन्द्र गिरी, राजेन्द्र विष्ट, धनबहादुर भट्ट, टेकराज अवस्थी, दिपकराज जोशी, ईश्वर थापामगर, विशाल विक, हरि अधिकारी, हरिहजुर थापा, शरण क्षेत्री, दुर्गा खड्का, द्वारिका थापा, राजु शेरचन, दुर्गा महतो, दिपक राज र कुलबहादुर थापालाई बन्द प्रशिक्षणका लागि छनोट गरिएको थियो ।
‘बङ्गलादेश भलिबल सङ्घले प्रतियोगिता सरेको जानकारी गराएपछि हाललाई प्रशिक्षण रोक्नु परेको हो’, नेपाली भलिबल टोलीका प्रशिक्षक जगदिशप्रसाद भट्टले भन्नुभयो, ‘खेलाडीले आ–आफ्नो क्लबमा अभ्यास जारी राख्नेछन् ।’ उक्त प्रतियोगितामा आयोजक बङ्गलादेशसहित नेपाल, अफगानिस्तान, तुर्किमिनिस्तान, कीर्गीस्तान, उज्वेकिस्तान, मालदिभ्सलगायत देशको सहभागिता रहने छ ।
