नेपालगञ्ज । अखिल नेपाल युवक संघका अध्यक्ष कृष्णराज पाण्डेले नेपालको संसद कब्जा गर्ने योजनासहित अमेरिकाले नेपालमा राजनीतिक दल खडा गरेको आरोप लगाउनुभएको छ ।
राष्ट्रिय जनमोर्चा बाँकेको आयोजनामा बिहीबार कोहलपुरमा अमेरिकी साम्राज्यवादका विरुद्ध आयोजित विरोध कार्यक्रमलाई सम्बोधन गर्दै उहाँले यस्तो बताउनुभएको हो ।
‘अमेरिकी साम्राज्यवादले अहिले नेपालमा हस्तक्षेप बढाउँदै लगेको छ । नेपालका ठूला दलहरू समेत त्यसको पिछ्लग्गु भएका छन्’ पाण्डेले भन्नुभयो, ‘एमसीसी जस्तो घातक परियोजना नेपालमा लागू गरि देशलाई युद् को क्रिडास्थल बनाउनेतर्फ षडयन्त्र भइरहेको छ । नेपालको संसद समेतमा कब्जा जमाउने उदेश्यले अमेरिकी चाहना अनुसार राजनीतिक पार्टी खोल्ने काम गरिएको छ ।’
अध्यक्ष पाण्डेको संकेत रवि लामिछाने नेतृत्वको राष्ट्रिय स्वतन्त्र पार्टीतर्फ थियो ।
विरोध सभालाई सम्बोधन गर्दै अखिल नेपाल किसान महासंघ (अफ्पा)का महासचिव तुलसिराम साप्कोटाले नेपालको राष्ट्रिय सार्वभौमिकतामाथि गम्भीर खतरा भएको उल्लेखगर्दै खतरापूर्ण अवस्थाबाट देशलाई जोगाउन संघर्षमा उत्रनु आवश्यक भएको बताउनु भयो ।
राजमो बाँकेका अध्यक्ष भीमप्रसाद देवकोटाको अध्यक्षतामा भएको कार्यक्रमको सञ्चालन जातीय समता समाजका केन्द्रीय सदस्य मनबहादुर सुनारले गर्नुभएको थियो ।
