काठमाडौं । आर्थिक लेनदेन विवादमा ढाकाकुमार श्रेष्ठलाई सांसद पदबाट हटाउने निर्णय गरेसँगै राष्ट्रिय स्वतन्त्र पार्टी (रास्वपा) ले विन्दवासिनी कंशाकारलाई समानुपातिक सांसद बनाउने भएको छ ।
मकवानपुरकी कंशाकार १० वर्षअघि एसिड आक्रमणमा परेकी थिइन्। विहेको प्रस्ताव अस्वीकार गर्दा केशरी नामक भारतीय नागरिकले उनको अनुहारमा एसिड छ्यापेको थियो ।
उनको अनुहारमा निकै क्षति पुगेको छ। अहिलेसम्म उनले २० पटक अनुहारको शल्यक्रिया गराइसकेकी छन्।
आठ वर्षसम्म न्यायका लागि भौँतारिएकी विन्दवासिनीले २ वर्षअघि मात्रै न्याय पाएकी थिइन् । दुई वर्षअघि पीडक भारतीय युवकलाई प्रहरीले पक्राउ गरेर ज्यान मार्ने उद्योगअन्तर्गत मुद्दा चलाएको थियो । पीडकलाई ८ वर्ष कैद र १ करोड १४ लाख रुपैयाँ जरिवानाको फैसला भएको छ।
रास्वपाले ढाकाकुमार श्रेष्ठलाई बुधबार साधारण सदस्य समेत नरहने गरी कारबाही गरेपछि समानुपातिक सूचीबाट विन्दवासिनी कंशाकारलाई निर्वाचित गराउन निर्वाचन आयोगलाई पत्र लेख्ने निर्णय गरेको छ।
श्रेष्ठलाई औपचारिक रुपमा पदमुक्त गर्न रास्वपाले संसद् सचिवालयमा पत्र पठाउनुपर्छ। संसद् सचिवालयमा गएको पत्र सभामुखले प्रतिनिधिसभाको बैठकमा पढेर सुनाएपछि उक्त पद रिक्त हुन्छ।
सभामुखले उनको पद रिक्त रहेको जानकारी गराएपछि निर्वाचन आयोगले नयाँ सांसद चयनको आवश्यक प्रक्रिया थाल्नेछ।
ढाकाकुमारले दुई करोड मागेको रास्वपाको ठहर, सांसद पद गयो
