काठमाडौं । राष्ट्रिय जनमोर्चाले रासायनिक मलको मूल्यवृद्धि गर्ने सरकारको निर्णयप्रति आपत्ति जनाएको छ ।
उपाध्यक्ष एवम् प्रवक्ता दुर्गा पौडेलले बुधबार एक विज्ञप्ति प्रकाशित गरी रासायनिक मलमा यसअघि दिइएको अनुदान कटौती नगर्न आग्रह गर्नुभएको छ ।
विज्ञप्तिमा किसानहरुले समयमा कृषि मल पाउन नसक्ने अवस्था रहेको भन्दै त्यसमाथि अनुदानसमेत कटौती गरी मूल्य बढाउने कार्यले किसानहरुले थप समस्या झेल्नुपर्ने बताइएको छ ।
वक्तव्यमा भनिएको छ, ‘अन्तर्राष्ट्रिय कारण देखाएर नेपाल सरकारले रासायनिक मलमा किसानहरुलाई दिइरहेको अनुदान कटौती गरी मूल्यवृद्धि गरेकोप्रति हाम्रो पार्टी राष्ट्रिय जनमोर्चाको गम्भीर ध्यानाकर्षण भएको छ ।
नेपालमा किसानहरुले समयमा कृषि मल पाउन नसक्ने तीतो यथार्थता हाम्रो अगाडि छ । अझ त्यसमाथि पाइरहेको अनुदान कटौती गरी मूल्य बढाउने कार्यले किसानहरुले चर्को समस्या झेल्नुपर्ने अवस्था आउने देखिन्छ ।
तसर्थ अनुदान कटौती गर्ने आफ्नो निर्णय फिर्ता लिई मूल्यवृद्धि फिर्ता गर्न सरकारसमक्ष जोडदार माग गर्दछौँ ।’
यही फागुन २६ गते नेपाल सरकारले रासायनिक मलमा दिइँदै आएको अनुदान कटौति गर्ने निर्णय गरेको थियो। सरकारको सो निर्णयप्रति देशभरका किसान हकहितसँग सम्बन्धित संघ, संगठनहरुले आपत्ति जनाउँदै तत्काल फिर्ता लिन माग गर्दै दवावस्वरुप आन्दोलन सुरु गरेका छन्।
