काठमाडौँ । राष्ट्रिय जनमोर्चाका केन्द्रीय उपाध्यक्ष जनकराज शर्मा प्रतिनिधि सभा चितवन क्षेत्र नं. २ को उपचुनावमा उम्मेदवार बन्नुहुने भएको छ । २०७९ फागुन २७ र २८ गते बुटवलमा सम्पन्न राजमोको राष्ट्रिय परिषद् बैठकले सो निर्णय गरेको हो ।
सुर्खेत वीरेन्द्रनगर नगरपालिका–११ बस्तीपुरमा बस्दै आउनुभएका शर्माको जन्म २०२० पुस १३ गते दैलेख जिल्ला हालको भगवतिमाई गाउँपालिका–१ थुवागाउँमा भएको थियो । हाल उपाध्यक्ष रहनुभएका शर्मा यसअघि राजमो महासचिव हुनुहुन्थ्यो । यसअघि उहाँ राजमोको जिल्ला अध्यक्ष, भेरीकणाली प्रदेश अध्यक्ष हुँदै केन्द्रीय सदस्य, सचिव जस्ता जिम्मेवारीमा हुनुहुन्थ्यो ।
२०३३ सालदेखि विद्यार्थी आन्दोलनबाट राजनीतिमा प्रवेश गर्नुभएका शर्मा गत मङ्सिर ४ गतेको प्रतिनिधि सभा निर्वाचनमा राजमोको समानुपातिकतर्फको उम्मेदवारसमेत रहिसक्नुभएको छ ।
जनपक्षीय राजनीति गरेबापत् उपाध्यक्ष शर्मालाई २०५२ सालमा राज्य विरुद्धको मुद्दा लागेको थियो । त्यसैगरी, २०५५ सालमा उहाँलाई हातहतियारसम्बन्धी मुद्दा लाग्दा २५ दिन प्रहरी हिरासतमा बस्नुभएको थियो ।
राजनीतिमा पेसेवर रूपमा क्रियाशील हुनुभन्दा अघि उहाँले शिक्षण र वकालत पेसा पनि अपनाउनुभएको थियो । त्यस क्रममा उहाँले २०४० सालतिर जाजरकोटको माध्यमिक तहमा र २०४९–५० सालतिर सुर्खेत बहुमुखी क्याम्पसमा शिक्षण गर्नुभएको थियो भने उहाँले दैलेख जिल्ला अदालत र सुर्खेत पुनरावेदन अदालतमा वकालत पनि गर्नुभएको थियो ।
चितवनको प्रतिनिधि सभा क्षेत्र नं. २ राष्ट्रिय स्वतन्त्र पार्टीका सभापति रवि लामिछानेको सांसद पद गत २०७९ माघ १३ गते सर्वोच्च अदालतले खारेज गरेपछि रिक्त भएको थियो । सो स्थानमा आगामी २०८० वैशाख १० गते उपनिर्वाचन हुँदै छ ।
