टुकबहादुर रामदाम, मस्कट (ओमन) ।
ओमान नेपाली एकता समाज केन्द्रीय समितिको आयोजनामा एक सय तेह्रौँ अन्तर्राष्ट्रिय श्रमिक महिला दिवस वनभोज कार्यक्रमसँगै मनाइएको छ ।
अन्तर्राष्ट्रिय नेपाली एकता समाजका केन्द्रीय सदस्य छविलाल बस्नेतको प्रमुख आतिथ्यमा गत मार्च १०, २०२३ शुक्रबारका दिन उक्त कार्यक्रम सम्पन्न भएको हो ।
समाजका द्वितीय उपाध्यक्ष शोभाराम पुनको अध्यक्षता तथा महासचिव शालिकराम आचार्य र लक्ष्मी रायमाझीको सञ्चालनमा अघि बढेको उक्त कार्यक्रममा अन्य अतिथिहरूमा महिला विभागकी रिता चौधरी, रक्तिम सांस्कृतिक अभियान ओमानका अध्यक्ष आकाश नेपालीलगायत हुनुहुन्थ्यो ।
कार्यक्रममा प्रमुख अतिथि छविलाल बस्नेतले मन्तव्य राख्ने क्रममा अन्तर्राष्ट्रिय श्रमिक महिला दिवसबारे चर्चा गर्नुभएको थियो । समान कामका लागि समान ज्याला, कामको समय सुनिश्चितता र मताधिकारका लागि चलेको आन्दोलनले अन्तर्राष्ट्रिय श्रमिक महिला दिवस मनाउने आधार तयार पारेको उहाँको भनाइ थियो । त्यस क्रममा उहाँले महिला नेतृ क्लारा जेट्किनको स्मरण गर्नुभयो ।
सम्बोधनको क्रममा उहाँले महिलाप्रति हुने लैङ्गिक विभेद, शोषण, दमन केही मात्रामा कमी भएता पनि पूरै नियन्त्रण भइनसकेकाले त्यसका विरुद्ध सङ्घर्ष गर्न सबै महिलाहरू सङ्गठित हुनुपर्नेमा उहाँले जोड दिनुभयो । ‘तपाईं महिला दिदीबहिनी जाग्नुपर्छ र समानतापूर्ण समाज निर्माणका लाग्नुपर्छ’ उहाँले भन्नुभयो– ‘महिला पुरुष समान हुन् । नारीले पनि पुरुषसरह हरेक क्षेत्रमा हरेक काम गर्न सक्छन् । त्यसैले समानताको सङ्घर्षमा नारीहरू अगाडि बढ्नुपर्दछ ।’
कार्यक्रममा विभिन्न रमाइला खेल र साङ्गीतिक प्रस्तुति प्रस्तुत गरिएको थियो । रमाइला खेलका विजेता तथा यातायातमा योगदान गर्नेहरूलाई कार्यक्रममा पुरस्कार प्रदान गरिएको थियो ।
