काठमाडौं । नेपाल कम्युनिष्ट पार्टी (मसाल) ले प्रतिगमनविरोधी भूमिकाका कारण राष्ट्रपतिमा रामचन्द्र पौडेललाई समर्थन गरेको स्पष्ट पारेको छ । उम्मेदवार कुन व्यक्ति र पार्टीको मान्छे भन्नुभन्दा पनि संविधान रक्षाको प्रश्न मुख्य भएको मसालले जनाएको छ ।

महामन्त्री मोहनविक्रम सिंहले आइतकार एक वक्तव्य प्रकाशित गरी अहिले राष्ट्रपतिको चुनावमा रामचन्द्र पौडेललाई समर्थन गरेका माओवादी र नेपाली कांग्रेस समेतसित कैयौँ राजनीतिक प्रश्नहरूमा आफ्नो गम्भीर प्रकारका मतभेदहरू रहँदै आएको स्पष्ट पार्नुभएको छ ।

अहिले राष्ट्रपतिको चुनावमा एकै ठाउँमा उभिएको भएपनि ती मतभेदहरूबारे आवश्यकताअनुसार लगातार संघर्ष अगाडि बढाउने नीति अपनाउने पनि महामन्त्री सिंहले स्पष्ट पार्नुभएको छ ।

यस्तो छ प्रेस वक्तव्य :
‘राष्ट्रपतिको पद एउटा ‘सेरेमोनियल’ पद हो । त्यसकारण त्यसको चुनावले खास राजनीतिक महत्व नराख्ने कुरा प्रस्ट छ । तैपनि अहिले हाम्रो देशमा राष्ट्रपतिको चुनावले विशेष अर्थ र महत्व राख्दछ । त्यस्तो किन हुन गएको छ ? त्यसबारे केही प्रकाश हाल्नुपर्ने आवश्यकता छ ।

अहिले हाम्रो देशमा राष्ट्रपतिको चुनावले विशेष अर्थ रमहत्व राख्नुको कारण यो हो कि त्यो प्रतिगमनका विरुद्धको सङ्घर्षको अङ्ग बन्न गएको छ । अहिले चुनावमा कुन व्यक्ति उठेको छ र कुन पार्टीका तर्फवाट उम्मेदवार बनेको छ ? त्यो भन्दा महत्वपूर्ण प्रश्न प्रतिगमनका तर्फवाट उम्मेदवार बनेको छ वा प्रतिगमनविरोधी पक्षवाट उम्मेदवार बनेको छ ? त्यो महत्वपूर्ण र निर्णयात्मक राजनीतिक महत्वको प्रश्न हो । अहिले एमालेका तर्फवाट राष्ट्रपतिको लागि उम्मेदवार बनेका सुवास तेम्वाङ पनि त्यो पदका लागि उपयुक्त र योग्य व्यक्ति हुन् । तर व्यक्तिगत रूपमा उपयुक्त र योग्य व्यक्ति भएको हुनाले नै एमालेले दुई, दुईपल्ट राष्ट्रपतिको चुनाव हुँदा उनलाई उम्मेदवार बनाएको थिएन । अहिले पनि राष्ट्रपतिको चुनावमा एमालेको उम्मेदवारले जित्ने सम्भावना भएको भए निश्चित रूपले ओलीले राष्ट्रपति पदको लागि उनलाई उम्मेदवार बनाउने थिएनन् । जे होस्, उनी राष्ट्रपति पदको लागि उपयुक्त र योग्य उम्मेदवार भएपनि अहिले उनी विजय भएमा त्यसबाट ओलीको प्रतिगामी राजनीतिलाई नै बल पुग्ने छ र, त्यसरी उनको विजय देशका लागि ठुलो घातक हुने छ ।

राष्ट्रपतिका अर्का उम्मेदवार रामचन्द्र पौडेल निरङ्कुश राजतन्त्र, पञ्चायती तानाशाही कालदेखि नै प्रजातन्त्रको लागि लगातार र दृढतापूर्वक सङ्घर्ष गर्दै आएका इमानदार र योग्य राजनीतिक व्यक्तित्व हुन् । उनी राष्ट्रपति पदको लागि ने.का.का तर्फबाट उम्मेदवार बनेका छन् । तर त्यो भन्दा महत्वपूर्ण कुरा यो हो कि उनी प्रतिगमनका विरुद्धको सङ्घर्षको क्रममा बनेको गठबन्धनका साझा उम्मेदवार हुन् । त्यसकारण उनको विजयबाट प्रतिगमनका विरुद्धको सङ्घर्षलाई मद्दत पुग्ने छ र त्यसरी जनताको महान् आन्दोलनद्वारा प्राप्त गणतन्त्र र धर्मनिरपेक्षता समेतको रक्षाको लागि मद्दत पुग्ने छ । त्यसैले ने.क.पा. (मसाल)ले राष्ट्रपतिको चुनावमा रामचन्द्रलाई दृढतापूर्वक समर्थन गर्ने निर्णय गरेको छ ।

राष्ट्रपतिको चुनावको सन्दर्भमा हामीले दुईवटा कुराहरू स्पष्ट गर्न चाहन्छौं । प्रथम, प्रतिगमनका विरुद्धको सङ्घर्षमा अहिले राष्ट्रपतिको चुनावको जति ठुलो महत्व राखेपनि त्यो चुनावमा आठ दलका साझा उम्मेदवारको विजयबाट देशमा कुनै आमूल परिवर्तन हुने छैन र त्यसका लागि हामीले लामो सङ्घर्ष गर्नुपर्ने छ । हाम्रो पार्टीले त्यो सङ्घर्षलाई लगातार अगाडि बढाउने प्रतिबद्धता प्रकट गर्दछ । द्वितीय, अहिले राष्ट्रपतिको चुनावमा रामचन्द्र पौडेललाई समर्थन गरेका माओवादी र ने.का. समेतसित कैयौं राजनीतिक प्रश्नहरूमा हाम्रा गम्भीर प्रकारका मतभेदहरू रहँदै आएका छन् । अहिले राष्ट्रपतिको चुनावमा हामी एकै ठाउ“मा उभिएको भएपनि ती मतभेदहरूबारे हामीले आवश्यकताअनुसार लगातार अगाडि बढाउने नीति अपनाउने छौं । विरोध र एकताका बिचमा तालमेल वा सन्तुलन कायम गर्ने संयुक्त मोर्चाको द्वन्द्वात्मक माक्र्सवादी–लेनिनवादी नीतिलाई हामीले पहिलेदेखि नै अपनाउँदै आएका छौँ र आगामी दिनहरूमा पनि अपनाउँदै जाने छौँ ।

अहिले देशमा प्रतिगमनको जुन खतरा उत्पन्न भएको छ, लाई हामीले गम्भीर रूपमा लिएका छौँ । कतिपय पक्षहरूले देशमा पैदा भएको त्यस प्रकारको खतराप्रति आखाँ चिम्लने तथा ओलीले त्यस प्रकारको प्रतिगमनको नेतृत्व गरेको कुरालाई अस्वीकार गर्ने गर्दछन् । त्यही गलत दृष्टिकोणका कारणले उनीहरूले राष्ट्रपतिको चुनावका सन्दर्भमा दुई उम्मेदवारहरूका बिचमा रहेको राजनीतिक अन्तरलाई पनि बुझ्न सक्दैनन् । प्रतिगमनका पक्षपातीहरूले खुला र घोषित रूपले नै एमालेका उम्मेदवारको समर्थन गर्छन् भने कतिपय पक्षहरूले प्रतिगमनका विरुद्धको सङ्घर्षको आवश्यकता र महत्वलाई ठिकसंग बुझ्न नसकेर आठ दलका साझा उम्मेदवार रामचन्द्र पौडेलको पनि विरोध गरेको पाइन्छ । तर हामीले जोडदार प्रकारले यो स्पष्ट गर्न चाहन्छौँ कि अहिलेको राष्ट्रपतिको चुनाव प्रतिगमन र प्रतिगमनका विरुद्धको सङ्घर्षको क्रममा नै भइरहेको छ । त्यो पक्षको उपेक्षा गर्नु गम्भीर राजनीतिक गल्ती हुने छ र त्यसका दूरगामी राजनीतिक परिणामहरू हुने छन् ।

अन्तमा, हामीले राष्ट्रपतिको चुनावमा रामचन्द्र पौडेलको विजयको कामना गर्दछौँ र त्यो चुनावमा उनको विजय हुने छ भन्ने कुरामा हामीलाई पूर्ण विश्वास छ ।
२०७९ फागुन २१ गते ।’
मोहनविक्रम सिंह
महामन्त्री