प्युठान । जातीय समता समाज प्युठानले सञ्चालन गरेको संगठनात्मक अभियान अन्तर्गत विभिन्न पालिका तथा वडाहरुमा भेला एवम् प्रशिक्षणको कार्यक्रम सञ्चालन भइरहेको छ ।
अभियानका क्रममा गौमुखी गाउँपालिका–६ खुङमा वडा समिति गठन भएको छ । जिल्ला समितिका कोषाध्यक्ष विनोद कुमार विक र पालिका अध्यक्ष अमर बिटालु रानाको उपस्तिथिमा सम्पन्न भेलाले टेक बहादुर परियारको अध्यक्षतामा १५ सदस्यीय समिति गठन गरेको छ ।
भेलामा नेकपा मसाल प्युठान जिल्ला प्रवक्ता ज्ञामुराम न्यौपाने, विनोद कुमार विक र अमर राना बिटालुले दलित आन्दोलन र समता समाजको उद्देश्य बारे प्रशिक्षण दिनुभएको थियो । साथै, भेलाले साबिक खुङ गाविसका ९ वटै वडामा संगठन विस्तार गर्ने योजना बनाएको छ ।
त्यसैगरी गौमुखी गाउँपालिका–४ पुजामा बृहत दलित भेला सम्पन्न भएको छ । साबिक पुजा गाविसका सबै वडाबाट उपस्थित प्रतिनिधि हरुबिच सम्पन्न भेलाको अध्यक्षता केसर बहादुर विकले गर्नुभएको थियो ।
दिपक सुनारको सन्चालन र मानबहादुर विकको स्वागतबाट अघि बढेको कार्यक्रममा प्रमुख अतिथी समाजका जिल्ला सचिव खिमबहादुर विक हुनुहुन्थ्यो भने जिल्ला कोषाध्यक्ष विनोद कुमार विक, जनप्रतिनिधि सावित्रा टोमटा, राजमो गौमुखी पालिका सचिव कृष्ण जैसीको आतिथ्यता रहेको थियो ।
भेलाले केसर बहादुर विकको अध्यक्षतामा १५ पूर्ण र ४ वैकल्पिक र ४ सल्लाहकार सहितको वडा समिति गठन गरेको छ । साथै समितिको पहिलो बैठकले साविक पुजा गाविसका सबै वडामा संगठन निर्माण गर्ने निर्णय पनि गरेको छ ।
प्युठानमा समता समाजको जिल्लाब्यापी संगठन निर्माण अभियान सुरु
