काठमाडौं । राष्ट्रिय जनमोर्चाका अध्यक्ष चित्रबहादुर केसीले राष्ट्रपतिको पदलाई कार्यकारी बनाउने खेल भइरहेको बताउनुभएको छ ।
शुक्रवार संघीय संसद भवन नयाँ बानेश्वरमा सञ्चारकर्मीहरुसँग कुराकानी गर्दै अध्यक्ष केसीले राष्ट्रपतिको पद अलांकारिक भएपनि कार्यकारी राष्ट्रपतिको रुपमा प्रयोग गर्न खोजिएको बताउनुभएको हो ।
उहाँले राष्ट्रपतिको पदलाई सक्रिय बनाउन खोज्नुले जनतामाझ नराम्रो सन्देश गएको बताउनु भयो । दलहरुले राष्ट्रपतिलाई सक्रिय बनाउन खोजेसँगै शक्ति राष्ट्रहरुको पनि दौडधुप बढेको उहाँले बताउनु भयो । शक्ति राष्ट्रहरुको बढ्दो आवत्–जावत्ले राजनीतिक पार्टीहरुको स्तर पनि गुमाएको उहाँले बताउनु भयो ।
उहाँले भन्नुभयो – ‘सबभन्दा समस्या त के भयो भने एउटा अलंकारिक राष्ट्रपतिका लागि यस खालको हल्ला, यस खालको शक्ति राष्ट्रहरुको पनि आवतजावत यसले राजनीतिक पार्टीहरुको स्तर असाध्यै गिराएको छ । त्यसकारणले अलांकारिक राष्ट्रपतिलाई सक्रिय कार्यकारी राष्ट्रपतिको रुपमा प्रयोग गर्न पल्केकाहरुले असाध्यै यो खेल खेलेका छन् । यसले गर्दाखेरी धेरै नराम्रो सन्देश गएको छ नेपाली जनताको बीचमा ।’
केसीले थप्नुभयो, ‘अलंकारिक राष्ट्रपतिलाई कार्यकारीको रुपमाझैँ जुनखालले खेल भएको छ, र यिनका कमजोरीबाट शक्तिराष्ट्रहरुको पनि दौडधुप छ । यसले गर्दाखेरी यो नेपाली जनताको बीचमा मात्रै होइन दुनियाँका अगाडी राम्रो सन्देश गएको छैन ।’
उहाँले नेपाली काँग्रेससहितको पुरानो पाँचदलिय गठबन्धन बन्न लागेको बताउनु भयो । उहाँले नयाँ सरकार बनेपनि राष्ट्रिय जनमोर्चाको नीति सरकारमा जाने नरहेको स्पष्ट पार्नुभयो ।
