काठमाडौं । नेपालको राजनीतिलाई प्रभावित पार्ने दुई ठूला राष्ट्र भारत र अमेरिकाका उच्च अधिकारी एकै दिन नेपाल भ्रमणमा आएका छन् ।
भारतका विदेश सचिव विनयमोहन क्वात्रा सोमबार विहान नेपाल आएका थिए भने संयुक्त राज्य अमेरिकाका दक्षिण तथा मध्य एसियाली मामिला ब्यूरो हेर्ने उपसहायक विदेशमन्त्री अफ्रिन अख्तर पनि आजै साँझ नेपाल भ्रमणमा आएकी छन् ।
नेपालमा पछिल्लो समय अमेरिकाको चासो बढ्दै गएको छ । एक पछि अर्को उच्चअधिकारी नेपाल आउने गरेका छन् । अमेरिकाको चासो बढेसँगै भारत सशंकित बनेको छ ।
राष्ट्रपति निर्वाचनको पूर्वसन्ध्यामा भारतले नेपालका लागि पूर्वराजदूतसमेत विदेश सचिव क्वात्रालाई नेपाल पठाएको छ भने यही बेला अमेरिकाका उच्च अधिकारीसमेत नेपाल आएकी छन् ।
नेपालमा रहेका भारतीय विदेशसचिव क्वात्राले सोमबार दिनभर राजनीतिक भेटघाट गरेका छन् ।
उनले राष्ट्रपति विद्यादेवी भण्डारीसँग शिष्टाचार भेट गरेका छन्। राष्ट्रपतिको कार्यालयमा आज भएको भेटमा द्विपक्षीय सहयोगका विविध विषयमा छलफल भएको बताइएको छ ।
सो अवसरमा दुई देशबीचको ऐतिहासिक सम्बन्धका साथै कनेक्टिभिटी, ऊर्जा व्यापारलगायत द्विपक्षीय सहयोगका विषयमा छलफल भएको परराष्ट्र मन्त्रालयले जनाएको छ। भेटमा राष्ट्रपति भण्डारीले नेपाल–भारतबीच प्राचीनकालदेखि नै सामाजिक र सांस्कृतिक सम्बन्ध रही आएको उल्लेख गर्दै द्विपक्षीय सम्बन्धका विविध विषयमा कुरा राखेकी राष्ट्रपतिका प्रमुख स्वकीय सचिव भेषराज अधिकारीले जानकारी दिए।
सो अवसरमा राष्ट्रपति भण्डारीले ‘छिमेकी पहिलो’ भन्ने नीतिअनुसार नै भारत अघि बढेको विश्वास व्यक्त गर्दै आफ्ना भारतीय समकक्षी र भारतीय उच्च नेतृत्वप्रति शुभकामना र शुभेच्छा प्रकट गरेकी थिइन्।
विदेश सचिव क्वात्रा परराष्ट्र सचिव भरतराज पौड्यालको निमन्त्रणामा नेपालको दुई दिने औपचारिक भ्रमणका लागि आज यहाँ आइपुगेका हुन्। यस अघि उनले आजै परराष्ट्रमन्त्री डा. विमला राई पौड्यालसँग शिष्टाचार भेटवार्ता गरेका थिए भने सचिवस्तरीय बैठकमा सहभागी भएका थिए। विदेश सचिवको कार्यभार सम्हालेपछिको यो उनको पहिलो नेपाल भ्रमण हो। दुई देशबीचको नियमित उच्चस्तरीय भेटवार्ताको परम्परा र भारतको ‘छिमेकी पहिलो’ नीतिअन्तर्गत भारतले नेपालसँगको सम्बन्धलाई दिएको प्राथमिकता अनुरुप यो भ्रमण भएको भारतीय विदेश मन्त्रालयले जनाएको छ।
यसैगरी विदेश सचिव क्वात्राले प्रधानमन्त्री पुष्पकमल दाहाल प्रचण्डसँग पनि भेटवार्ता गरेका छन् । प्रधानमन्त्री दाहालसँग विदेश सचिव क्वात्राले सोमबार बालुवाटारमा सिस्टाचार भेट गरेका हुन् ।
सोमबार नेपाल आएका क्वात्राले सोमबार साँझ नै नेपाली कांग्रेसका सभापति शेरबहादुर देउवालाई भेटेका छन्।
यसअघि उनले नेपालस्थित परराष्ट्र मन्त्रालयका सचिव भरतराज पौड्याल, परराष्ट्रमन्त्री विमला राई पौड्यालसँग पनि भेट गरिसकेका छन्।
क्वात्राले मंगलबार पनि राजनीतिक भेटलाई जारी राख्ने भएका छन्। उनले नेकपा (एमाले) का अध्यक्ष केपी ओली, राप्रपाका अध्यक्ष राजेन्द्र लिङदेन तथा मधेशवादी दलका नेताहरु महन्थ ठाकुर, उपेन्द्र यादव, सिके राउतलगायतसँग भेटघाट गर्नेछन् ।
अमेरिकी उपसहायक विदेशमन्त्रीको भेटघाट मंगलबार
यस्तै, आज (सोमबार) साँझ नेपाल आइपुगेकी संयुक्त राज्य अमेरिकाका दक्षिण तथा मध्य एसियाली मामिला ब्यूरो हेर्ने उपसहायक विदेशमन्त्री अफ्रिन अख्तरले मंगलबारदेखि राजनीतिक घेटघाट गर्दैछिन् ।
भ्रमणका क्रममा उनले अन्तर्राष्ट्रिय एकीकृत पर्वतीय विकास केन्द्र (इसिमोड) तथा ऊर्जा नेपालका साझेदारसँग छलफल गर्ने यहाँस्थित अमेरिकी दूतावासले जनाएको छ । साथै उनले नेपाली सेना र सरकारी अधिकारीसँग भेटघाट गर्ने बताइएको छ।
यसैगरी उपसहायक विदेशमन्त्री अख्तरले जलवायु परिवर्तन, स्वच्छ ऊर्जा, मानवीय सहायता तथा विपद् प्रतिकार्यका विषयमा र लोकतन्त्र, मानवाधिकार तथा पारस्परिक आर्थिक समृद्धिलाई अगाडि बढाउने सम्बन्धमा पनि छलफल गर्नेछिन् ।
