काठमाडौं । राष्ट्रियसभाको उपाध्यक्षमा नेकपा (माओवादी केन्द्र) की उर्मिला अर्याल निर्विरोध निर्वाचित भएकी छन् । अर्यालको मात्रै उम्मेदवारी परेपछि उनी निर्विरोध निर्वाचित भएकी हुन् ।
आइतबार दिउँसो संघीय संसद भवनको लोत्से हलमा पुगेर उहाँले सो पदमा उम्मेदवारी दिइन् । सत्तारुढ दलहरुकोतर्फबाट साझा उम्मेदवारी दिनु भएकी उनको प्रस्तावमा उपप्रधानमन्त्री एवम् भौतिक पूर्वाधार तथा यातायातमन्त्री नारायणकाजी श्रेष्ठ छन् भने समर्थकमा नेकपा (एमाले)का राष्ट्रियसभा संसदीय दलका नेता देवेन्द्र दाहाल र सांसद खिमलाल देवकोटा थिए ।
पूर्वमन्त्री समेत रहेका अर्यालले राष्ट्रियसभाको उपाध्यक्षको रुपमा आफूले तटस्थ भूमिका निर्वाह गर्ने बताइन् । उनले सञ्चारकर्मीमाझ आफूले कार्य सम्पादन गर्दा दलीय गन्ध आउन नदिने प्रतिवद्धता समेत व्यक्त गरिन् । अर्यालले राष्ट्रियसभालाई अझै गरिमामय बनाउने र सांसदहरुको क्षमता अभिवृद्धिका लागि आफ्नो प्रयास रहने कार्ययोजना रहेको पनि बताइन् ।
संघीय संसद सचिवालयले आज अपरान्ह ४ बजेसम्म सो पदका लागि मनोनयन दर्ता गर्ने र माघ २३ गते (भोली) सोमबार सो पदको निर्वाचन हुने गरी राष्ट्रियसभा बैठक बोलाइएको छ । विपक्ष नेपाली कांग्रेस लगायतका दलहरुले उम्मेदवारी दिएनन् ।
