काठमाडौं । डोल्पामा नेकपा (एमाले) र माओवादी केन्द्रका कार्यकर्ताबीच झडप भएको छ । झडपमा दुवैतर्फका गरी नौ कार्यकर्ता घाइते भएका छन् ।
आइतबार राति जगदुल्ला गाउँपालिका–३ थापागाउँस्थित वडा कार्यालय नजिकै झडप हुँदा एमालेका ४ र माओवादीका ५ जना कार्यकर्ता घाइते भएका प्रहरीले जनाएको छ ।
कर्णाली प्रदेश प्रहरी कार्यालयका अनुसार झडपमा परी एमाले समर्थित जगदुल्ला गाउँपालिका–३ थापागाउँका ४२ वर्षीय जालपा बोहोरा, ५० वर्षीया शान्ता बोहोरा, ३८ वर्षीया भद्र बोहोरा र सोही ठाउँमा १२ वर्षीया कृष्णजंग बोहोरा घाइते भएका छन्।
यस्तै, माओवादी समर्थित जगदुल्ला गाउँपालिका–३ थापागाउँका ५९ वर्षीया बिर्ख बोहोरा, १८ वर्षका लक्ष्मण बोहोरा घाइते भएका छन्। ५४ वर्षका गोरसिंह बोहरा, १६ वर्षीया पबिन्द्र बोहरा र २१ वर्षका जगत बोहरा घाइते भएका छन्।
घाइते सबैको स्थानीय स्वास्थ्य चौकी झ्याकोटमा उपचार भइरहेको छ। मदिरा सेवन गरेका कार्यकर्ताबीच सामान्य विवादले झडपको रुप लिएको प्रहरीले जनाएको छ।
