काठमाडौँ । अखिल नेपाल सुकुम्बासी सङ्घले उचित व्यवस्थापनबिना सुकुम्बासीलाई हटाउन नहुने बताएको छ ।
अध्यक्ष तुलसीराम सापकोटाको हस्ताक्षरमा २०७९ मङ्सिर १४ गते प्रेसवक्तव्य जारी गर्दैै सुकुम्बासी सङ्घले यस्तो अवधारणा व्यक्त गरेको हो ।
वक्तव्यमा नागरिकको बाँच्न पाउने तथा गास, बास र कपासको अधिकारको संरक्षण गर्ने राज्यको अधिकार भएको भन्दै उपर्युक्त आवश्यकतामाथि जोड दिएको छ ।
प्रेसवक्तव्यको पूर्ण पाठ यस्तो छ :
“बागमती किनारमा लामो समयदेखि बस्दै आइरहेका सुकुम्बासीका बस्तीलाई हालै काठमाडौँ महानगरपालिकाद्वारा डोजर लगाई अमानवीय तरिकाले घरटहरा भत्काई उठिबास लगाउने कार्य गरेकोमा अखिल नेपाल सुकुम्बासी सङ्घको गम्भीर ध्यानाकर्षण भएको छ ।
राज्यले हरेक नागरिकको बाँच्न पाउने अधिकार, गास, बास, कपासलगायतका नैसर्गिक अधिकारको संरक्षण गरेको हुन्छ र गर्नु पनि पर्दछ । कुनै पनि नागरिकले नेपालभित्र आफ्नो घरटहरा बनाई बसेको छ भने त्यसको विकल्पबिना उठिबास लाउन मिल्दैन । बागमती किनारमा लामो समयदेखि बस्दै आएका सुकुम्बासीहरूको उचित व्यवस्थापनबिना उनीहरूलाई हटाउनु हुँदैन । उचित व्यवस्थापनबिना हटाइएमा वा उठिबास गरिएमा त्यो गम्भीर र अमानवीय कार्य हुने छ । महानगरपालिकाद्वारा हालै गरिएको उक्त निन्दनीय कदमप्रति गम्भीर आपत्ति र क्षोभ प्रकट गर्दछौँ ।”
अखिल नेपाल सुकुम्बासी सङ्घ अखिल नेपाल किसान महासङ्घ (अप्फा) को आङ्गिक सङ्गठन हो ।
