काठमाडौं । हुम्लाको चङ्खेली गाउँपालिका वडा नम्बर ५ को डाँफे मतदान केन्द्रमा झडप हुँदा एक जना प्रहरी सहायक निरीक्षक घाइते भएका छन्।
घाइते हुनेमा असई राम कुमार चौधरी रहेको हुम्लाकी प्रमुख जिल्ला अधिकारी सिता परियारले जानकारी दिनुभयो ।
वारेसनामा भोट हाल्न नदिएको भन्दै बढेको विवाद पछि झडप भएको हो । उनका अनुसार झडपलाई नियन्त्रण गर्नमा लागि अहिले मतदान रोकिएको छ।
दार्चुलामा हवाइ फायर
यता, दार्चुलाको शैल्यशिखर नगरपालिका ५ मालिकार्जुन मावि ग्वानी बगौरा मतदान केन्द्रमा हवाई फायर भएको छ । मतदानको विषयमा विवाद हुँदा दुई पक्षीय झडपको स्थिती सृजना भएपछि प्रहरी हवाइ फायर गरेको हो।
हवाइ फायर पछि केही समय मतदान स्थगित भएको थियो। अहिले भने मतदान पुनः सुचारु भएको जिल्ला प्रहरी कार्यालय दार्चुलाका प्रहरी निरीक्षक राजेश शाहीले जानकारी दिनुभयो ।
मतहाल्न पुगेका एक जना मतदाताको मत पहिल्यै अरुले हालेको पाएपछि भएको समान्य विवादका क्रममा प्रहरीले सम्झाउने क्रममा एक जना महिलाको टाउकोमा लठ्ठीले लागेको थियो ।
त्यसपछि स्थानीयबासिन्दाले आक्रोशित हुँदै ढुंगामुठा गर्न थालेपछि ३ राउण्ड हवाई फायर गर्नु परेको प्रहरीले जनाएको छ ।
दोलखामा पनि हवाइ फायर
दोलखाका विभिन्न मतदान केन्द्रमा झडप भएको छ। झडप नियन्त्रणमा लिन प्रहरीले १५ राउण्ड बढी हवाई फायर गरिसकेको बागमति प्रदेश प्रहरी प्रमुख डीआईजी किरण बज्रचार्यले जानकारी दिनुभयो ।
अहिले त्यहाँ नेपाली सेना र सशस्त्र प्रहरीको थप जनशक्ति पठाइएको छ। झडपपछि केही स्थानमा पुनः मतदान सुरु भएपनि केही स्थानमा अझै मतदान रोकिएको छ।
अर्घाखाँचीको मालारानीमा मतदान रोकियो
अर्घाखाँचीको मालारानीको एक केन्द्रमा मतपत्र फरक मतपेटीकामा परेपछि मतदान स्थगित भएको छ। मालारानीको आदर्श मावि खनदहको केन्द्रमा प्रदेशको प्रत्यक्षको मतपत्र संघको प्रत्यक्षको पेटिकामा परेपछि स्थगित भएको हो।
विवादपछि मतदान केहीबेरको लागि स्थगित गरी छलफल थालिएको अर्घाखाँचीका प्रमुख जिल्ला अधिकारी शसिधर घिमिरेले बताउनुभयो ।
