काठमाडौं । यही मंसिर ४ गते हुने प्रतिनिधि सभा र प्रदेश सभाको निर्वाचन पर्यवेक्षण गर्न विभिन्न देशका पर्यवेक्षक नेपाल आएका छन् ।
निर्वाचनको अन्र्तराष्ट्रिय पर्यवेक्षकका रुपमा सहभागी हुन भारतका प्रमुख निर्वाचन आयुक्त राजीव कुमार शुक्रबार नेपाल आएका छन् । यस्तै, भुटानका प्रमुख आयुक्त सोनाम तोप्गे पनि शुक्रबारै काठमाडौं आइपुगेका छन् ।
यसअघि माल्दिभ्सका प्रमुख निर्वाचन आयुक्त फुवद थोफिक बिहीबारै नेपाल आइसकेका छन् । यस्तै, रुसको एक विज्ञ टोली चार दिनअघि नै आइसकेको छ ।
निर्वाचन आयोगका सहायक प्रवक्ता कमल भट्टराईका अनुसार बंगलादेशका प्रमुख निर्वाचन आयुक्त कजि हबिबुल अवल शनिबार नेपाल आउँदैछन् । त्यसैगरी जापानका विदेशराज्यमन्त्री ताकेई सुनसुके आइतबार नेपाल आइपुग्ने कार्यक्रम छ ।
दक्षिण कोरियाका निर्वाचन आयुक्तको एक टोली पनि भोली नै काठमाडौ आउँदैछ । निर्वाचन आयोगले अन्तर्राष्ट्रिय पर्यवेक्षणका लागि आह्वान गरेअनुसार विभिन्न देशबाट पर्यवेक्षक आएका हुन् ।
