चेन्नई । निजी क्षेत्रबाट विकसित पहिलो भारतीय रकेट शुक्रबार वायुमण्डलको माथिल्लो भागमा प्रक्षेपण गरिएको छ ।
भारतीय अन्तरिक्ष अनुसन्धान सङ्गठन (इसरो) को प्रत्यक्ष भिडियोअनुसार आधा टनको विक्रम–एस रकेट मध्याह्नअघि नै प्रक्षेपण गरिएको थियो ।
एजेन्सीका अनुसार छ मिनेटपछि उक्त रकेट सकुशल समुद्रमा खसेको थियो । स्थानीय स्टार्टअप स्काइरुट एयरोस्पेसले विकास गरेको यो रकेट पृथ्वीलाई बाह्य अन्तरिक्षबाट छुट्याउने अन्तर्राष्ट्रिय मान्यताप्राप्त १०० किलोमिटरको कर्मन रेखाभन्दा ९० किलोमिटर (५५ माइल) को उचाइमा पुगेको थियो ।
‘यो वास्तवमै भारतको अन्तरिक्ष कार्यक्रमको यात्रामा नयाँ सुरुवात हो, नयाँ बिहानी हो’ विज्ञानमन्त्री जितेन्द्र सिंहले श्रीहरिकोटाको दक्षिणी टापुमा रकेटको प्रक्षेपण सुविधामा उत्साही प्राविधिकसँग प्रक्षेपणपछि भन्नुभयो ।
स्टार्ट नाम दिइएको पहिलो विक्रम–एस मिसनको पूर्वसन्ध्यामा सरकारले बिहीबार रकेट कार्बन कम्पोजिट स्ट्रक्चर र थ्री डी प्रिन्टेड कम्पोनेन्ट्सका साथ एकल मञ्च सिङ्गल स्टेज, सोलिड फ्युल रकेट निर्माण गरिएको हो ।
भारतले हालैका वर्षमा आफ्नो अन्तरिक्ष कार्यक्रमलाई तीव्र रूप दिइरहेको छ, जसमा सन् २०२३ वा २०२४ का लागि रुसी सहयोगमा एक मानवसहितको रकेट निर्माण पनि समावेश छ ।
सन् २०१४ मा मङ्गलयान अर्बिटरमार्फत् मङ्गल ग्रहमा पुग्ने भारत पहिलो एसियाली राष्ट्र बनेको थियो । यसको कम लागतको लागि प्रशंसा गरिएको, त्यो मिसनले भारतलाई संयुक्त राज्य अमेरिका, रुस र युरोपेली सङ्घसहितको समूहमा समाहित गरायो ।
भारतले विश्वव्यापी व्यावसायिक अन्तरिक्ष बजारमा आफ्नो दुई प्रतिशत हिस्सा बढाउन पनि काम गरिरहेको छ । विज्ञहरूका अनुसार भारतले विद्यमान अन्तरिक्ष प्रविधिको नक्कल गरेर र अनुकूलन गरेर लागत कम राख्न सक्छ । (रासस/एएफपी)
