बागलुङ । पाँचदलीय गठबन्धनले बागलुङ जिल्लाको क्षेत्र नं १ मा निरन्तर जनभेटघाटलाई तीब्रता दिएको छ ।
यसै क्रममा मंगलबार काठेखोला गाउँपालिका वडा नं ४ मा जनभेटघाट तथा चुनावी प्रचार प्रसार कार्यक्रम सम्पन्न भएको छ ।
प्रचार प्रसार कार्यक्रम तंग्रामको धारा खेल मैदान करम्दी, ठुलोगाउँ, फापरखेतमा सम्पन्न भएको थियो ।
जनभेटघाट तथा प्रचार कार्यक्रममा बागलुङ प्रतिनिधिसभा निर्वाचन क्षेत्र नं.१ का उम्मेदवार तथा राष्ट्रिय जनमोर्चाका अध्यक्ष चित्र बहादुर केसीले यो गठबन्धन निर्वाचन जित्नका लागि नभई लोकतन्त्र बचाउनका लागि भएको बताउनुभयो ।
उहाँले लोकतन्त्र र संविधानको रक्षाका लागि गठबन्धनको जित अनिवार्य छ भन्दै गठबन्धनका उम्मेदवारलाई विजयी बनाउन अनुरोध गर्नु भयो ।
कार्यक्रममा निर्वाचन क्षेत्र नं. १ क का प्रदेशका उम्मेदवार तथा नेपाली कांग्रेस बागलुङका पूर्वसभापति दिपेन्द्र बहादुर थापाले नेपाली जनताले दिएको दुई तिहाईको जनमतलाई अवमूल्यन गरी संविधान बिपरित २/२ पटक संसद विघटन गर्ने शक्तिलाई जनताले परास्त गरिदिने बताउनुभयो । साथै दिगो विकासको लागि गठबन्धनका उम्मेदवारहरुलाई बिजयी गराउने बताउनु भयो ।
कार्यक्रममा राष्ट्रिय जनमोर्चाका केन्द्रीय सदस्य राजेन्द्र ढुङगाना, नेकपा माओवादी केन्द्रका केन्द्रीय सदस्य कृष्ण केसी, नेकपा एकीकृत समाजवादी बागलुङका अध्यक्ष लालबहादुर थापा, नेपाली कांग्रेस प्रदेश समिति सदस्य अमर बहादुर कार्की, नेपाली कांग्रेसका प्रदेश समानुपातिक उम्मेदवार ज्ञान कुमारी श्रीस कँडेल, चम्पादेबि खड्का, राष्ट्रिय जनमोर्चा प्रदेश समानुपातिक उम्मेदवार पियारी थापा, लक्ष्मी बास्कोटा, नेकपा माओबादी केन्द्रका प्रदेश समानुपातिक उम्मेदवार कुशुम बुढा, लक्ष्मी खड्का, नेकपा एकीकृत समाजवादी बागलुङका सदस्य श्याम पुन, पाँच दलिय गठबन्धन निर्वाचन परिचालन समिति काठेखोला ४ का संयोजक विष्णु कँडेल, क्षेत्रीय सचिवालय सदस्य मनिष थापा, वडा सचिवालय संयोजक विष्णु आलेले मन्तव्य राख्नु भएको थियो ।
प्रचार कार्यक्रममा पाँचदलीय गठबन्धनका केन्द्र, प्रदेश, जिल्ला र पालिकास्तरीय नेता तथा कार्यकर्ताहरुको सहभागी रहेको थियो ।
