सोल । भूत भगाउने मान्यताका साथ मनाइने पर्व हलोविनका क्रममा अक्टोबर ३०, २०२२ शनिवारको राति दक्षिण कोरियामा भागदौड मच्चिदा ज्यान गुमाउनेको सङ्ख्या १५४ पुगेको छ भने एक सय ४९ जना घाइते भएका छन् ।
घाइतेमध्ये ३३ जनाको अवस्था गम्भीर रहेकाले मृतकको सङ्ख्या बढ्न सक्ने सुरक्षा अधिकारीहरूले बताएका छन् ।
दक्षिण कोरियाली गृह मन्त्रालयका अनुसार उक्त घटनामा २६ जना विदेशीको मृत्यु भएको छ भने १५ जना घाइते भएका छन् ।
कोरियाली सरकारले सो घटनाको सन्दर्भमा शनिबारसम्म साताव्यापी राष्ट्रिय शोक घोषणा गरेको छ । राष्ट्रपति युनसुक येओले मृतकप्रति श्रद्धाञ्जली अर्पण गर्दै घाइतेको शीघ्र स्वास्थ्यलाभको कामना गर्नुभएको छ ।
यसैबिच, कोरियाली प्रहरीले उक्त घटनाको अनुसन्धान थालेको छ । प्रहरीको १६१ सदस्यीय कार्यदल बनाएर अनुसन्धान थालिएको गृह मन्त्रालयले एक विज्ञप्ति निकालेर जनाएको छ ।
विशेषज्ञसहितको प्रहरी टोलीले भागदौड मच्चिएको स्थानमा जडित क्यामराले खिचेका दृश्य र सामाजिक सञ्जालमा सम्प्रेषण गरिएका भिडियोलाई विश्लेषण गरेर घटनाको छानबिन प्रारम्भ गरेको हो ।
भविष्यमा यस्ता घटना दोहोरिन नदिन आवश्यक व्यवस्थासहितको प्रणाली विकास गरिने प्रधानमन्त्री हान डकसुकले बताउनुभएको छ । (रासस/सिन्ह्वा)
