वासिङटन । संयुक्त राज्य अमेरिकामा विद्यालयमा हुने गरेका हिंसाका घटना सन् २०२२ मा झन् बढ्दै गएको पाइएको छ । अस्ट्रेलियाको एउटा संस्थाले गरेको अनुसन्धानमा सो तथ्य देखा परेको हो ।
सो अनुसन्धानका अनुसार अमेरिकामा पहिलेका वर्षका तुलनामा यस वर्ष दुई महिना बाँकी छँदै विद्यालयमा बन्दुक आक्रमणका घटना बढी देखिएको छ ।
सन् २०२१ अमेरिकी इतिहासमै सबैभन्दा धेरै यस्ता हिंसाका घट्ना भएको वर्ष भनिएकोमा सन् २०२२ का दुई महिना बाँकी छँदै अहिले नै दुई सय ५७ ओटा घटना यस वर्ष मात्र भएको पाइएको छ ।
सन् २०२१ मा यहाँका विद्यालय तथा विश्वविद्यालयमा यस्ता घटना दुई सय ५० ओटा भएका थिए । ती घटनाका तुलनामा अहिले बढेको अस्ट्रेलियाली मिडिया नेटवर्क संस्था द कन्भरसेसन्सले जानकारी दिएको छ ।
सो संस्थाले तीन जना अमेरिकी अपराध न्यायसम्बन्धी विज्ञसँग पनि अमेरिकामा विद्यालय, विश्वविद्यालयमा यहाँका किसोरकिसोरीले गर्ने गरेका बन्दुक हमलाका विषयमा कुराकानी गरेर एक विश्लेषण पनि अनुसन्धानका क्रममा तयार पारेको जनाएको छ ।
अमेरिकी किसोरकिसोरीले विद्यालयमा हुने गरेका सानातिना विवादमा पनि बन्दुक हमला गरेर आफ्ना साथीहरूको हत्या गर्ने गरेका छन् । अमेरिकामा सन् २०१८ देखि २०२२ सम्ममा भएका यस्ता हिंसाका घटनाबाट कम्तीमा पनि ५२ जनाको ज्यान गएको छ । (रासस/सिन्हवा)
