काठमाडौँ । निर्वाचन आयोगलले आचार संहिता विपरीत विभिन्न दलका नेता, उम्मेदवारले चुनावी सभालाई सम्बोधन गर्दै आयोग र आयोगका पदाधिकारीका सम्बन्धमा दिएको अभिव्यक्तिका विषयमा ध्यानाकर्षण गराउँदै २४ घन्टाभित्र स्पष्टीकरण पेस गर्न निर्देशन दिएको छ ।
आयोगले ती दलका नेता र उम्मेदवारले दिएको अभिव्यक्ति विषयमा अलग अलगरुपमा पत्र पठाइ स्पष्टीकरण माग गरेको हो ।
आयोगले नेकपा (माओवादी केन्द्र) का केन्द्रीय सदस्य लक्षीराम आचार्य, सुदूर पश्चिम प्रदेश सरकारका भौतिक पूर्वाधार विकास मन्त्री एवम् कैलालीको प्रदेशसभा क्षेत्र नं. ४ (क) का उम्मेदवार दीर्घबहादुर सोडारी, नेपाली काङ्ग्रेस सुदूर पश्चिम प्रदेशका सभापति एवम् कैलाली क्षेत्र नं. ४ का प्रतिनिधि सभाका सदस्य वीरबहादुर बलायरलाई स्पष्टीकरण सोधेको हो । उहाँहरूले कैलालीको क्षेत्र नं. ४ (क) को चुनावी सभालाई सम्बोधन गर्दै आचार संहिता विपरीत कार्य गरेको आयोगको दाबी छ ।
निर्वाचन आचार संहिता–२०७९ को दफा ४ मा सबैले पालना गर्नुपर्ने आचरणअन्तर्गत खण्ड (ढ) मा ‘निर्वाचनको विश्वसनीयतामा वा आयोग, आयुक्त वा कर्मचारीको प्रतिष्ठामा प्रतिकूल असर पर्ने गरी कुनै अवान्छित लान्छना लगाउन नहुने’ व्यवस्था रहेको स्मरण गराउँदै आयोगले निर्वाचन आयोग ऐन–२०७३ को दफा २२ बमोजिम बनेको निर्वाचन आचार संहिता–२०७९ असोज १२ गतेदेखि लागु गरिसकेको स्पष्ट गरिएको छ ।
आयोगबाट आचार संहिता लागु भइसकेको विषयको सम्पूर्ण जानकारी रहेको अवस्थामा जिम्मेवार पार्टीको जिम्मेवार स्थानमा रहेर निर्वाचन आचार संहिताको विपरीत हुने गरी अभिव्यक्ति दिएको देखिएको सन्दर्भमा कुनै माध्यमबाट प्राप्त भएको २४ घण्टाभित्र निर्वाचन आयोग वा प्रदेश निर्वाचन कार्यालय कैलालीमा स्पष्टीकरण पेस गर्न उहाँहरूलाई आयोगले भनेको छ ।
“तपाईंहरूले कैलालीको प्रदेशसभा क्षेत्र नं. ४ (क) मा बिहीबार आयोजित कार्यक्रममा निर्वाचन आयोग नेपाल र यसका पदाधिकारीउपर लान्छनापूर्ण अभिव्यक्ति दिनुभएको सूचना र सोलाई पुष्टी गर्ने सामग्री आयोगमा प्राप्त भइसकेको सन्दर्भमा तपाईंले उक्त अभिव्यक्ति दिनुभएको होइन भन्ने आधार र प्रमाण के छ ?” उहाँहरूलाई सोधिएको पत्रमा भनिएको छ– “तपाईंले सार्वजनिक मञ्चमा दिनुभएको लान्छनापूर्ण अभिव्यक्तिले निर्वाचन आचारसंहिता–२०७९ को दफा ४ को खण्ड (ढ) को उल्लङ्घन हुन गएकाले तपाईंलाई निर्वाचन आयोग ऐन–२०७३ को दफा २३ को उपदफा (३) बमोजिमको कारबाही किन हुनुनपर्ने हो ?”
