मस्को । बेल्गोरोड क्षेत्रमा रुसी सैन्य स्थलमा शनिबार आतङ्कवादी हमला भएको छ । हमलामा परी कम्तीमा ११ जनाको मृत्यु हुनुका साथै १५ जना घाइते भएका छन् ।
युक्रेननजिकैको रुसी सेनाको सैन्य स्थलमा दुई स्वयम्सेवी सैनिकले अन्य सेनामाथि गोली हानेको रुसी रक्षा मन्त्रालयले जनाएको हो ।
मन्त्रालयले एक विज्ञप्तिमा उक्त गोलीबारी युक्रेनसँग सीमा जोडिएको दक्षिण–पश्चिमी रुसको बेल्गोरोड क्षेत्रमा भएको जनाएको छ । अज्ञात भूतपूर्व सोभियत राष्ट्रका दुई स्वयम्सेवकहरूले लक्ष्य अभ्यासको क्रममा अन्य सैनिकलाई गोली हानेको र जवाफी गोली प्रहारमा मारिए जनाइएको छ । मन्त्रालयले यस घटनालाई आतङ्कवादी हमला भनेको छ ।
रुसी रक्षा मन्त्रालयलाई उद्धृत गर्दै तास समाचार समितिले पश्चिमी सैन्य जिल्लामा प्रशिक्षण सत्रको क्रममा शनिबार आक्रमण भएको हो ।
बन्दुकधारीहरू पूर्व सोभियत राज्यका थिए । रुसी अधिकारीले उक्त हमलालाई आतङ्कवादी कार्यको सङ्ज्ञा दिएका छन् । (रासस/एएनआई)
