ढाका । बङ्गलादेशमा हजारौँ पार्टी कार्यकर्तामाथि हिंसाको नक्कली आरोप लगाई सरकारले विपक्षी दललाई व्यापक दमन गरेको छ ।
प्रधानमन्त्री शेख हसिनाका आलोचकले हालैका महिनामा विद्युत कटौतीको विरोधमा र तटस्थ कामचलाउ सरकारको नेतृत्वमा निर्वाचनको माग गर्दै देशभर प्रदर्शन गरेपछि दमन भएको दाबी गरिएको छ ।
विपक्षी बङ्गलादेश नेसनलिस्ट पार्टी (बिीएनपी) का प्रवक्ता सैरुल कबिर खानले अगस्ट २२ यता प्रहरीले कम्तीमा चार हजार ८१ जना पार्टीका समर्थक र नेतालाई हिंसाको आरोपमा मुद्दा चलाएको बताउनुभयो ।
अन्य २० हजार अज्ञात बिएनपी समर्थकमाथि पनि विभिन्न मुद्दामा आरोप लगाइएको छ । उहाँले भन्नुभयो– ‘अधिकारकर्मीहरूले कुनै पनि विपक्षी समर्थकलाई उत्पीडन गर्न पुलिसलाई व्यापक शक्ति दिने रणनीति अख्तियार तय गरेको छ । विपक्षी कार्यकर्ता तथा समर्थकलाई प्रदर्शनमा भाग लिनबाट रोक्ने बलियो विकल्पका रूपमा सरकारले प्रहरीलाई प्रयोग गरेको छ ।’
खानले एएफपीलाई दिएको जानकारीअनुसार प्रदर्शनका क्रममा पाँच कार्यकर्ताको मृत्यु भएको छ भने दुई हजारभन्दा बढी घाइते भएका छन् ।
बिएनपीको सडक प्रदर्शनमा मुख्यत: सत्तारूढ अवामी लिगका कार्यकर्ताले हिंसात्मक आक्रमण गर्दा प्रहरीले हस्तक्षेप गरेको थिएन तर यदि हामीले प्रतिकार गर्यौँ भने उनीहरूले प्रतिक्रिया जनाउने गरेका थिए ।
प्रहरीका अनुसार कम्तीमा तीनओटा प्रदर्शनमा चार जनाको मृत्यु भएको छ तर विपक्षीले हिंसा भड्काएको आरोप लगाएको छ ।
न्युयोर्कस्थित मानव अधिकार अनुगमनकारी संस्थाले सोमबार विपक्षी दलका सदस्यको घरमा प्रहरीले व्यापक गिरफ्तारी र छापा मारेको भन्दै चिन्ता व्यक्त गरेपछि खानको यो टिप्पणी आएको हो ।
एचआरडब्ल्यूकी दक्षिण एसिया निर्देशक मीनाक्षी गाँगुलीले २०२३ को डिसेम्बरमा हुन लागेको संसदीय चुनावका लागि यो अशुभ सङ्केत भएको बताउनुभयो ।
गत डिसेम्बरमा संयुक्त राज्य अमेरिकाले सयौँ बलपूर्वक बेपत्ता पारिएका र हजारौँ गैरन्यायिक हत्यामा संलग्न भएको आरोपमा बङ्गलादेशका सात शीर्ष सुरक्षा अधिकारी र विशिष्ट र्यापिड एक्सन बटालियनमाथि प्रतिबन्ध लगाएको थियो ।
सरकारले विपक्षी समर्थक र नेताहरूलाई जबर्जस्ती बेपत्ता पार्नुमा आफ्नो हात रहेको भन्ने दाबीलाई अस्वीकार गरेको छ र अधिकारीहरूसँगको मुठभेडमा धेरै अपराधी मारिएको बताएको छ ।
सन् २००९ देखि सत्तामा रहेको सरकारले अमेरिकी प्रतिबन्धको धेरै हदसम्म अवहेलना गरेको र गत महिना प्रतिबन्धित एक अधिकारीलाई राष्ट्रिय प्रहरी प्रमुखमा पदोन्नति गरेको छ ।
बङ्गलादेशी प्रहरीका प्रवक्ता मोन्जुर रहमानले अधिकारीहरूले विपक्षी कार्यकर्तालाई लक्षित गरेको भन्ने आरोपको खण्डन गर्दै भन्नुभयो– ‘बलले देशका प्रत्येक नागरिकको अधिकारको सम्मान गर्दछ र कानुनी व्यवस्थाको प्रत्याभूत गर्न मात्र हस्तक्षेप गरेको थियो ।’ (रासस/एएफपी)
