सियोल । उत्तर कोरियाले अक्टोबर ९, २०२२ आइतबार बिहानै दुई ब्यालेस्टिक क्षेप्यास्त्र समुद्रमा प्रक्षेपण गरेको दक्षिण कोरियाली सेनाले जनाएको छ ।
आणविक शक्तिसम्पन्न अमेरिकी विमानवाहक पोतले कोरियाली प्रायद्वीपमा संयुक्त अभ्यास सम्पन्न गरेको केही घण्टापछि उत्तर कोरियाले क्षेप्यास्त्र परीक्षण गरेको हो ।
सियोल, टोकियो र वासिङटनले हालैका हप्तामा संयुक्त नौसैनिक अभ्यास बढाएपछि प्योङयाङ रिसाएको थियो । उत्तर कोरियाले अभ्यासलाई आक्रमणको पूर्वाभ्यासको रूपमा हेर्छ र क्षेप्यास्त्र प्रक्षेपणलाई आवश्यक प्रतिकारको रूपमा सही विकल्प मान्छ ।
लामो समयदेखि वार्ता ठप्प भएपछि प्योङयाङले गत साता जापानमाथि मध्यम दुरीको ब्यालेस्टिक क्षेप्यास्त्र प्रहार गर्दै प्रतिबन्धित हतियार कार्यक्रमलाई दोब्बर बनाएको छ भने अधिकारी र विश्लेषकहरूले अर्को आणविक परीक्षणको तयारी पूरा भएको चेतावनी दिएका छन् ।
दक्षिण कोरियाली सेनाले आइतबार भनेको छ– ‘ग्रीनविच समयानुसार १६ः४८–१६ः५८ को १० मिनेटको अन्तरालमा काङवोन प्रान्तको मुनचोन क्षेत्रबाट पूर्वी सागरतर्फ प्रहार गरिएका दुईओटा छोटो दुरीका ब्यालेस्टिक क्षेप्यास्त्र फेला परेका छन् ।’
सियोलका ज्वाइन्ट चिफ्स अफ स्टाफले एक विज्ञप्ति जारी गर्दै क्षेप्यास्त्र ९० किलोमिटरको उचाइमा करिब ३५० किलोमिटर (२१७ माइल) उडेको बताएका छन् ।
टोकियोले पनि क्षेप्यास्त्र प्रक्षेपणको पुष्टि गरेको छ भने तटरक्षक बलले ती क्षेप्यास्त्र जापानको विशेष आर्थिक क्षेत्रभन्दा बाहिर खसेको बताएको छ ।
जापानका वरिष्ठ उपरक्षामन्त्री तोसिरो इनोले टोकियोले ती क्षेप्यास्त्रको विश्लेषण गरिरहेको बताउँदै तीमध्ये कुनै एक पनडुब्बीबाट प्रक्षेपण हुने ब्यालेस्टिक क्षेप्यास्त्र (एसएलबिएम) हुन सक्ने सम्भावना रहेको बताए ।
सियोलले गत महिना उत्तर कोरियाले एसएलबिएम प्रहार गर्ने तयारी गरिरहेको सङ्केत फेला परेको बताएको थियो ।
अमेरिकी सेनाको इन्डो–प्यासिफिक कमान्डले एक विज्ञप्ति जारी गर्दै आफूहरूले आफ्ना सहयोगी र साझेदारसँग नजिकबाट परामर्श गरिरहेको र यो प्रक्षेपणले उत्तर कोरियाको क्षेप्यास्त्र कार्यक्रमको अस्थिर प्रकृतिलाई उजागर गरेको जनाएको छ । (रासस/एएफपी)
