वासिङटन । अमेरिकी राष्ट्रपति जो बाइडेनले शीतयुद्धपछि पहिलोपटक विश्वमा आणविक युद्धको जोखिम रहेको बताउनुभएको छ ।
राष्ट्रपति बाइडेनले युक्रेन युद्धमा रुसी राष्ट्रपति भ्लादिमिर पुटिनले कसरी युद्ध अन्त्य गर्न चाहन्छन् भन्ने जिज्ञासाका साथै अहिले विश्वमा आणविक युद्धको खतरा रहेको बताउनुभएको हो ।
‘सन् १९६२ मा केनेडी र क्युबाको क्षेप्यास्त्र सङ्कटपछि हामीले आणविक युद्ध सम्भावनाको सामना गरेका छैनौँ’ पूर्व अमेरिकी राष्ट्रपति जोहन एफ केनेडीलाई उद्धृत गर्दै बाइडेनले न्युयोर्कमा आयोजित डेमोक्र््याटिक पार्टीको आर्थिक सङ्कलन कार्यक्रममा भन्नुभयो ।
पुटिनले युक्रेनमाथि आक्रमण गर्न आणविक हतियार प्रयोग गर्ने धम्की दिँदा पुटिनले ठट्टा नगरेको बाइडेनले बताउनुभएको छ ।
राष्ट्रपति पुटिनको आणविक धम्कीका कारण सिर्जित जोखिमबारे बोल्दै र ६० वर्षअघि सोभियत सङ्घले क्युबामा क्षेप्यास्त्र तैनाथ गरेपछि उत्पन्न आणविक गतिरोधलाई सङ्केत गर्दै उहाँले भन्नुभयो– ‘क्युबाको क्षेप्यास्त्र सङ्कटपछि पहिलोपटक आणविक हतियारको प्रयोगबाट हामीलाई प्रत्यक्ष खतरा छ ।’
बाइडेनले भन्नुभयोे– ‘हामी पुटिनको युद्ध अन्त्य रणनीतिबारे पत्ता लगाउने प्रयास गरिरहेका छौँ ।’
पुटिनले युक्रेनी भूमि कब्जा गर्ने प्रयासमा विकल्प समाप्त भएको महसुस गरेमा आणविक हतियार प्रयोग गर्ने धम्की दिएका छन् ।
विज्ञका अनुसार यी आक्रमण तुलनात्मक रूपमा साना र रणनीतिक आक्रमण हुने छन् तर बाइडनले सीमित क्षेत्रमा हुने यस्ता आक्रमणले अझै व्यापक द्वन्द्व निम्त्याउने चेतावनी दिनुभएको छ ।
बाइडेनले भन्नुभयो– ‘हामीले राम्रोसँग चिनेका छौँ । पुटिनले ‘सामरिक आणविक हतियार वा जैविक वा रासायनिक हतियारको सम्भावित प्रयोगको बारेमा कुरा गर्दा ठट्टा गर्दैनन् ।’ (रासस/एएफपी)
