इस्लामावाद । पाकिस्तानमा भारी वर्षा र बाढीका कारण रेल दुर्घटनामा पर्दा गएको २४ घन्टामा कम्तीमा पनि १९ जनाको ज्यान गएको छ । पाकिस्तानको बिपत् व्यवस्थापन प्राधिकरणले सो कुराको जानकारी दिएको छ ।
प्राधिकरणले यहाँको रेल सेवा पनि मौसमी वर्षाका कारण प्रभावित हुन पुगेको बताएको छ । बिहीबार राति प्राधिकरणले सार्वजनिक गरेको एक रिपोर्टमा गएको २४ घन्टामा १९ जनाको ज्यान गएको र त्यस दुर्घटनामा नौ जना बालबालिका र अरू सात महिला पनि परेका जानकारी गराइएको छ ।
भारी वर्षा र बाढीले पाकिस्तानमा ठुलो जनधनको क्षति हुन पुगेको छ । यहाँका एक हजारभन्दा बढी व्यक्तिको बाढीबाट ज्यान गएको छ भने अरू हजारौँ जना घाइते भएका छन् ।
यहाँ केही दिनयता देखि भारी मात्रामा वर्षा भएको छ भने यसका कारण यहाँका कैयौँ स्थानमा पहिरो गएको छ । पहिरोका कारण सडकमा क्षति पुगेको छ । यसबाट रेलका लिक बिग्रिएका छन् । यसबाट हुन गएको रेलको दुर्घटनामा परी गएको २४ घन्टायता मात्र कम्तीमा पनि २४ जनाको ज्यान गएको बताइएको छ ।
बाटो, बिजुलीलगायतका भौतिक पूर्वाधारमा पनि यहाँको बाढीपहिरोले क्षति पु¥याएको छ । पाकिस्तानको दक्षिणी सिन्ध प्रान्त बाढी र पहिरोबाट सबैभन्दा बढी प्रभावित हुन पुगेको छ । हिजो मात्र सिन्ध प्रान्तमा १२ जनाको ज्यान गएको छ भने अरू कैयौँ घाइते भएका छन् । (रासस/सिन्हवा)
