टेकराज भुसाल, बुटवल ।
अर्घाखाँचीको भूमिकास्थान नगरपालिकाका प्रमुख झविलाल थापाले नगरलाई नमूना नगरको रुपमा विकास गर्ने प्रतिवद्धता व्यक्त गर्नुभएको छ ।
भूमिकास्थान–रुपन्देही सम्पर्क समाजको प्रथम बृहत् भेला तथा तीज मिलन कार्यक्रमलाई शनिवार बुटवल १२ मिलनपार्कमा उद्घाटन गर्दै नगर प्रमुख थापाले सो प्रतिवद्धता व्यक्त गर्नुभएको हो ।
सो क्रममा मेयर थापाले नगरपालिका भन्दा बाहिर रहेका आफ्ना जनतासँग समन्वय, सहकार्य र सुझावका आधारमा भूमिकास्थान नगरपालिकालाई नमुना नगरको रुपमा विकास गर्ने बताउनुभयो ।
विद्यालय क्षेत्रमा विद्यार्थीको व्यवहारिक ज्ञानको लागि कृषि विशेष कार्यक्रम सञ्चालन गरेको तथा विद्यालयको गुणस्तर वृद्धिगर्न विद्यालयसँग नगरपालिका कार्यक्रम सञ्चालन गरेको जानकारी दिनुभयो ।
सेङलेङ, मसिनालाई पर्यटक मियोको रुपमा अगाडि बढाउने लगायत पर्यटनका विषयलाई प्राथमिकतामा राखेर नगरपालिकाले काम गरेको उहाँले बताउनुभयो ।
कार्यक्रममा नगर उपप्रमुख बालकृष्ण बन्जाडेले गाउँ समाजको विकासमा सबैको साथ सहयोग आवश्यक भएको भन्दै भ्रष्टाचारमुक्त नगरपालिका र शुसासन कायम भएको नगरको रुपमा भूमिकास्थानलाई विकास गर्ने बताउनुभयो ।
नगर प्रवक्ता तथा वडा नम्बर ४ का अध्यक्ष बाबुराम पन्थीले चुनावको बेला मतदातासँग गरिएको प्रतिवद्वता पुरा गर्ने आश्वासन दिँदै स्वार्थ भन्दा माथि उठेर काम गर्न सबैको साथ सहयोग र सुझाव सल्लाहको आवश्यक रहेको बताउनुभयो ।
कार्यक्रममा वडा नम्बर ३ का अध्यक्ष कृष्णप्रसाद बन्जाडे, वडा नम्बर ६ का अध्यक्ष प्रेम नारायण बेल्वासे, वडा नम्बर ८ का अध्यक्ष राजकुमार श्रेष्ठ, वडा नम्बर ९ का अध्यक्ष खेमराज चुदाली लगायतले शुभकामना मन्तव्य राख्नुभएको थियो ।
भेलाले लक्ष्मण बेल्वासे अध्यक्ष रहेको २१ सदस्यीय भूमिकास्थान (अर्घाखाँची) रुपन्देही सम्पर्क समाजको गठन समेत गरेको छ।
जसको उपाध्यक्षमा क्रमशः ढुण्डिराज खनाल, गोपाल गैरे, कृष्णप्रसाद मरासिनी, दिलिप चुदाली र रामप्रसाद भुसाल, सचिवमा यमप्रसाद गैरे, सहसचिवमा गोविन्द खनाल र माया वली, कोषाध्यक्षमा खुश्बु भण्डारीलाई चयन गरेको छ भने सदस्यहरुमा योगेन्द खनाल, सन्तोष बन्जाडे, मिना आचार्य, गिता बन्जाडे, सुस्मिता आचार्य, लक्ष्मण गैरे, अजय पौडेल, प्रकाश जिसी, ज्ञानु पाण्डे र २ सदस्यीय रिक्त राखेको छ।
कार्यक्रम भूमिकास्थान रुपन्देही सम्पर्क समाज भेला आयोजक समितिका अध्यक्ष लक्ष्मण बेल्वासेको अध्यक्षता, सचिव यम प्रसाद गैरेको सञ्चालन र उमलाल बन्जाडेको स्वागतमा सम्पन्न भएको थियो ।
