काठमाडौं । मधेश प्रदेशका पूर्वप्रमुख डा. राजेश अहिराजले रैथाने मधेशीको भविष्य खतरामा परेको बताउनुभएको छ ।

संसदको दुवै सदनले पारित गरेको नागरिकतासम्बन्धी अध्यादेशविरुद्ध खरो रुपमा प्रस्तुत हुँदै आउनुभएका अहिराजले नागरिकताकै कारण नेपाली राष्ट्रियता र सबैभन्दा पहिले रैथाने मधेशीको अस्तित्व संकटमा पर्ने बताउनुभयो ।

अहिराजले सोमबार ट्वीट गर्दै लेख्नुभएको छ, ‘आफूलाई मधेशवादी भनिदिएको सुन्न रुचाउनेहरु मतको लागि उत्तेजनाको राजनीति गरेर हिजो मधेशबाट पहाडी लखेटे । भोलि रैथाने (वंशज) मधेशीलाई नलखेटला ? रैथाने वंशज मधेशीहरुको भविष्य खतरामा छ, बेलैमा सचेत बनौँ।’

आफू लाई मधेशवादी भनिदिएको सुन्न रुचाउने हरु मत को लागि उत्तेजनाको राजनीति गरेर हिजो मधेशबाट पहाडी लखेटे, भोलि रैथाने ( बंशज) मधेशी लाई नलखेटला ? रैथाने बंशज मधेशीहरुको भविस्य खतरामा छ, बेलैमा सचेत बनौ।

— Rajesh Ahiraj (@rajesh_ahiraj) August 15, 2022

हालै संसदले पारित गरेर प्रमाणीकरणका लागि राष्ट्रपति कार्यालयमा पठाएको नागरिकता विधेयक राष्ट्रपति विद्यादेवी भण्डारीले आइतबार संसदमै फिर्ता गरिदिनुभएको थियो । सो विधेयकलाई सरकारले फेरि जस्ताको तस्तै राष्ट्रपति कार्यालय पठाउने तयारी गरेको बुझिएको छ ।

डा. अहिराजले नेपाल जस्तो संवेदनशील भूराजनीतिक अवस्था भएको देशले नागरिकतामा कडाइ गर्नुपर्ने, बाबुआमा दुवै वंशज भएमात्रै सन्तानलाई वंशजको नागरिकता दिनुपर्ने, विदेशबाट विवाह गरेर आएका बुहारीलाई निश्चित अवधि पार गरेपछि मात्रै नागरिकता दिनुपर्ने र अंगीकृत नागरिकलाई राजनीतिक अधिकारी दिन नहुने बताउँदै आउनुभएको छ ।

विद्यमान नागरिकता विधेयक खुकुलो हुनुका साथै निकट भविष्यमै नेपाली नेपालमै अल्पमतमा पर्नसक्ने अहिराजको चिन्ता छ ।