काठमाडौं । अमेरिकी सहायक विदेशमन्त्री डोनाल्ड लु बिहीबार नेपाल आउने भएका छन् । लु दुई दिने भ्रमणका लागि बिहीबार साँझ नेपाल आइपुग्ने परराष्ट्र मन्त्रालय स्रोतले जनाएको छ ।
परराष्ट्र स्रोतका अनुसार दक्षिण तथा मध्य एसिया मामिला हेर्ने जिम्मेवारीमा रहेका लु ले प्रधानमन्त्री शेरबहादुर देउवा र परराष्ट्र मन्त्री डा. नारायण खड्कासँग शुक्रबार भेटवार्ता गर्ने कार्यक्रम तय भएको छ।
लु केही महिना अघि पनि नेपाल आएका थिए । त्यसक्रममा उनले उच्च भेटघाट गरेका थिए । त्यसक्रममा उनले नेपाललाई अमेरिकी परियोजना मिलेनियम च्यालेन्ज कर्पोरेसन (एमसीसी) को विषयमा चीनले उचालेको आरोप लगाएका थिए । संसदबाट विवादित एमसीसी पास गरेको सरकारले हालै सरकारले विवादित अमेरिकी स्टेट पार्टनरसिप प्रोग्राम एसपीपी अस्वीकार गर्ने निर्णय गरेको छ तर अमेरिकालाई त्यसबारे पत्र पठाएको छैन ।
एमसीसी र एसपीपीलाई लिएर दुई शक्ति राष्ट्र चीन र अमेरिकाबीच नेपाल मामिलामा दोहोरी चलिरहेको छ।
दुई साताअघि चिनियाँ कम्युनिष्ट पार्टीका विदेश विभाग प्रमुख लिउ जियानचाओले चार दिन लामो भ्रमण गरेर फर्किएका थिए । त्यसक्रममा लिउले अमेरिकाले एमसीसीको विषयमा अमेरिकाले नेपालमाथि अनावश्यक दबाव दिएको बताएका थिए ।
