गोपालप्रसाद भट्टराई, अर्घाखाँची ।
अर्घाखाँचीको भूमिकास्थान नगर प्रमुख झविलाल थापाले नगरको चौतर्फी विकासको निम्ति सबै क्षेत्र श्रम र उत्पादनसँग जोडिनु पर्ने बताउनुभएको छ । आन्तरिक स्रोत कम भए पनि भूमिकास्थानमा कृषि र पर्यटनको प्रचुर सम्भावना रहेकोले यसलाई व्यवसायिक बनाएर समृद्धि हासिल गर्न सकिने उहाँको धारणा छ ।
भूमिकास्थान–४ को नवनिर्मित वडा कार्यालय भवन उद्घाटन गर्दै नगर प्रमुख थापाले १० वटै वडामा घुम्ती स्वास्थ शिविर चलाउने उदघोष गर्नुभयो । आगामी आर्थिक वर्षका योजना सुनाउँदै थापाले कक्षा १२ सम्म शिक्षालाई निशुल्क बनाउँदै उत्पादनसँग जोड्नुको विकल्प नभएको उल्लेख गर्नुभयो ।
शिक्षा, स्वास्थ, कृषि र पर्यटनलाई विकासको आधार मानेर अगाडी बढ्ने भन्दै नगरपालिकामा मुस्कान सहितको सेवालाई चुस्त ढङ्गले कार्यान्वयन गर्न नगरप्रमुख थापाले मातहतका निकायलाई निर्देशन समेत गर्नुभएको छ ।
कार्यक्रममा नगर उप–प्रमुख बालकृष्ण बन्जाडेले मन्तव्य राख्दै स्थानीय सरकारसंग धेरै अपेक्षा गरेको बताउँदै सेवालाई ब्यापकता र विकासमा एकताको खाचो औँल्यानुभएको छ ।
नेताहरूले उधारो आश्वासन बाँडेर राजनीतिलाई धुमिल्याएको भन्दै उप–प्रमुख बन्जाडेले जनतालाई झुक्याउने राजनीति नगर्न आग्रह गर्नुभएको छ । कार्यक्रममा प्रमुख प्रशासकीय अधिकृत लिल बहादुर राउत क्षेत्रीले भवन निर्माण भएसँगै वडाबासीलाई गुणस्तरीय सेवा सहज र छरितो प्रदान गर्न सहयोग पुग्ने विश्वास व्यक्त गर्नुभएको छ ।
परम्परागत झन्झटिलो प्रणालीलाई त्यागेर आधुनिक प्रणालीमा अव्यस्त हुन पनि उहाँले कर्मचारीलाई निर्देशन गर्नुभएको छ ।
भूमिकास्थान–४ का वडाअध्यक्ष बाबुराम पन्थीको अध्यक्षता, वडासचिव निलम शाहीको स्वागत र शेषकान्त घिमिरे ओशनको सञ्चालनमा सम्पन्न कार्यक्रममा भूमिकास्थान–५ का वडाअध्यक्ष जयगोपाल श्रेष्ठ, राष्ट्रिय जनमोर्चाका नेता कृष्ण सुनार र जग्गादाता जगत बहादुर खड्काले मन्तव्य राख्दै राम्रो काममा हातेमालो र गलत काममा खबरदारी गर्दै जानुपर्नेमा जोड दिनुभएको छ ।
विकास र जनसेवाको निम्ती गतकालका गल्ती सच्याउँदै अगाडि बढ्न उहाँहरुको सुझाव समेत रहेको छ ।
