गिरीप्रसाद बुढा, कर्णाली ।
महंगी, भ्रष्टाचार, बेरोजगारीलगायतका विषयमा राष्ट्रिय जनमोर्चाको देशव्यापी विरोध कार्यक्रम अन्तर्गत शनिबार (असार १८ गते) दैलेखमा विरोध प्रदर्शन गरिएको छ । राष्ट्रिय जनमोर्चा दैलेखले जिल्ला सदरमुकाम दैलेख बजारमा कोणसभाको कार्यक्रम गरी विरोध प्रदर्शन गरेको हो ।
कोण सभामा बोल्दै रोजमोका केन्द्रीय सदस्य कमल विक्रम शाहीले देशमा बढ्दै गइरहेको भ्रष्टाचार, महंगी र बेरोजगारको सिलसिला हेर्दा अहिले सम्मका कुनै पनि सरकारले देश र जनताको हितमा काम नगरेको पुष्टि भएको बताउनुभयो ।
उहाँले युवाहरुलाई निरास भएर वा रोजगारीको खोजीमा विदेश पलायन हुनु भन्दा देशको बेथितिको विरुद्धमा सशक्त भई उठेमा देशको मुहार छिटो फेरिने विचार व्यक्त गर्नुभयो ।
उक्त कोण सभामा बोल्ने बक्ताहरुले माथिल्लो कर्णाली जल विद्युत आयोजना स्वदेशी लगानीमै सम्पन्न गर्नुपर्ने कुरालाई पनि विशेष जोड दिएका थिए । यसका साथै बक्ताहरुले महङ्गी र भ्रष्टाचारको कडा विरोध गर्दै देशको राष्ट्रियताको रक्षा गर्न खुकुलो नागरिकता नीति र संघीयताको खारेजी अनिवार्य रहेको धारणा समेत राखेका थिए ।
राष्ट्रिय जनमोर्चा दैलेखका सहसचिव नरबहादुर सिंहको सञ्चालन अघि बढेको कार्यक्रममा राजमो कर्णाली प्रदेशका सचिव पूर्णबहादुर शाही, र दैलेख जिल्ला अध्यक्ष भिमसिंह विष्टले पनि मन्तव्य राख्नु भएको थियो ।
