काठमाडौं । आज असार १५ । अर्थात धान दिवस । कृषिप्रधान देश नेपालमा असार १५ लाई ‘मानो रोपेर मुरी फलाउने’ दिनको रुपमा लिइन्छ । असार–साउन महिनामा देशैभर किसानले रोपाइँ गर्ने भएपनि असार १५ लाई धान रोप्ने मुख्य दिनको रुपमा लिने गरिन्छ ।
नेपालमा मल, बीउ, सिंचाइलगायतको समस्या जहिल्यै किसानले भोग्नुपर्ने समस्या हो । धान रोप्ने बेलामा मल बीउ नपाउँदाको हैरानी, सिंचाइ सुविधा नहुँदा आकाशे पानीको भर पर्नुपर्ने बाध्यता त छँदैछ । अझ युवा शक्ति पलायन भएका कारण अधिकांश स्थानमा जग्गा बाँझै छ ।
यिनै समस्याका कारण नेपाल कृषिप्रधान देश भएपनि वर्षेनी ४३ अर्ब रुपैयाँको धान र चामल आयात हुने गरेको छ ।
किसानका लागि रोपाइँ सास्ती भएपनि विभिन्न राजनीतिक दल र तिनका भातृ संगठनका लागि भने असार १५ मस्तिको दिन हुने गरेको छ ।
किसानका पीडालाई गिज्याउँदै कैयौँ मानिसहरु सुकिला मुकिला लुगा र जुत्ता लगाएरै हिलोमा खेल्ने, सेल्फी खिच्ने तथा हिलोमै टेन्ट टाँगेर आफ्नो पार्टी र समूहको झण्डा प्रदर्शन गर्ने जस्ता दृश्य यो वर्ष पनि देखियो ।
बुधबार धान दिवस मनाउन ललितपुरको फर्सीडोलमा जम्मा भएका नेकपा एमाले कार्यकर्ताले हिलोमै कुटाकुट गरे । एमाले निकट राष्ट्रिय युवा संघ नेपालले आयोजना गरेको रोपाइँ कार्यक्रममा रेस्लर अस्मिता जुरेली र युवा संघका कार्यकर्ताबीच कुटाकुट भएको हो।
एमालेका महासचिव शंकर पोख्ररेल सहभागी रोपाइँमा रमाइलो गर्दा गर्दै एक युवक र जुरेलीबीच भनाभन भएपछि कुटाकुट सुरू भएको थियो । जुरेलीले ती युवकलाई झापड हानेको दृश्य सामाजिक सञ्जालमा देखिन्छ ।
घुँडासम्मको बुट लगाएर हिलोमा पसेकी अभिनेत्री करिश्मा मानन्धर भने लफडा हुन थालेपछि खेतबाहिर निस्किएकी थिइन् ।
यता, नेकपा माओवादी केन्द्र निकट अखिल (क्रान्तिकारी) ले भने हिलोमा टेन्ट टाँगेर जात्रा देखाएको छ ।
काठमाडौंको तारकेश्वर स्थित एमडीएस बहुउद्देश्यीय कृषि केन्द्रमा आयोजित कार्यक्रममा धान दिवस मनाउन माओवादीका कार्यकर्ता टेन्ट टाँगेरै हिलो खेलिरहेका देखिन्थे ।
