काठमाडौँ । लोकगायिका दिलमाया सुनारको हत्या आरोपमा सिन्धुपाल्चोकका सूर्य श्रेष्ठविरुद्ध किटानी जाहेरी परेको छ ।
आइतबार दिलमायाका पिता केशर विकले प्रहरी वृत्त बालाजुमा किटानी जाहेरी दिएको प्रहरीले जनाएको छ ।
गायिका दिलमायाको शनिबार राति आफ्नै कोठामा मृत अवस्थामा फेला परेकी थिइन् । त्यो राति सँगै रहेका श्रेष्ठलाई प्रहरीले पक्राउ गरिसकेको छ।
सिन्धुपाल्चोकको साँगाचोकगढीका सूर्य भन्ने खिलबहादुर श्रेष्ठ १५ महिनादेखि दिलमायासँग अवैध सम्बन्धमा रहेको खुलेको छ। उनका ४ छोराछोरी र श्रीमती गाउँमै छन्। दिलमायाका एक छोरा छन्। श्रीमानसँग डिभोर्स भइसकेको थियो।
दिलमायाले झुन्डिएर आत्महत्या गरेको श्रेष्ठले बताएका छन्। तर उनका गतिविधि शंकास्पद पाइएपछि प्रहरीले उनीमाथि अनुसन्धान गरिरहेको छ।
श्रेष्ठले दिलमाया झुन्डिएको भनिएको सल महाराजगन्जस्थित झाडीमा फेला परेको छ। मोबाइल भने अझै भेटिएको छैन।
दिलमायाको पोष्टमार्टम रिपोर्ट पनि आउन बाँकी छ।
मृत भेटिनुअघि उनले फेसबुकमा लामो स्टाटस लेख्दै आफूले जीवनसँग हार खाएको उल्लेख गरेकी थिइन्।
शुक्रबार साँझ आफूलाई बाँच्न मुस्किल भएको भन्दै स्टाटस लेखेकी सुनार शनिबार मृत अवस्थामा फेला परेकी हुन्। सुर्खेतकी सुनार काठमाडौंको नेपालटारमा डेरामा बस्थिन्।
गायिका दिलमाया लाइभ दोहोरीका कारण चर्चामा थिइन। उनले गायक राजु परियारसँग मिलेर गाएका केही गीत निक्कै चर्चित छन्।
