काठमाडौं । नेपाल कम्युनिष्ट पार्टी (मसाल) ले आगामी संसदीय निर्वाचनसम्म पाँचदलीय गठबन्धन कायम रहने कुरामा आशंका व्यक्त गरेको छ ।
यही असार ६ गते बसेको पार्टीको केन्द्रीय समिति बैठकले गत स्थानीय निर्वाचनको समीक्षा गर्दै दलहरुको कार्यशैलीका कारण आगामी निर्वाचनसम्म गठबन्धन कायम रहने आशंका गरेको हो ।
मसालले गठबन्धनमा रहेका पाँच दलमध्ये राष्ट्रिय जनमोर्चा बाहेक अन्य दलमा इमान्दारिताको अभाव रहेको निष्कर्ष निकालेको छ ।
चुनावी समीक्षाको बुँदा नं २५ मा भनिएको छ, ‘पाँचदलीय गठबन्धन र चुनावी तालमेलको नीतिलाई कार्यान्वयन गर्ने पक्षमा अन्य कतिपय पक्षले विभिन्न प्रकारका कार्यशैली अपनाएका छन् । त्यो कुरामाथि विचार गर्दा आगामी प्रदेश र संसदीय चुनावमा पनि त्यस प्रकारका
गलत कार्यशैलीको पुनरावृत्तिको सम्भावनालाई पूरै अस्वीकार गर्दा अहिलेको पाँचदलीय एकता वा चुनावी तालमेल आगामी चुनावसम्म कायम रहने छ वा छैन ? निश्चित रूपले भन्न मुश्किल पर्दछ ।’
मसालले गठबन्धन कायम नरहे पनि प्रतिगमनविरोधी शक्तिसँग अधिकतम सहमति गरेर प्रतिगमनलाई पराजित गर्ने पार्टीको नीति रहेको पनि स्पष्ट पारेको छ ।
२५ बुँदे समीक्षाको अन्तमा भनिएको छ, ‘जे होस्, हाम्रो यो दृढ विचार छ कि प्रतिगमनलाई पराजित गर्नका लागि पहिले जस्तै आगामी दिनमा पनि पाँचदलीय चुनावी तालमेल कायम राख्ने र त्यसको समझदारीलाई इमानदारितापूर्वक अगाडि बढाउने हामीले प्रतिबद्धता प्रकट गर्दछौँ तर पाँच दलभित्रका अन्तर्विरोध वा पारस्परिक अविश्वासका कारणले त्यो तालमेल कायम रहन सकेन भने पनि प्रतिगमनका विरुद्धको संघर्षमा सहकार्य गर्दै आएका विभिन्न पक्षसित अधिकतम सहमति कायम गरेर प्रतिगमनलाई पराजित गर्ने हाम्रो नीति र प्रयत्न हुनेछ ।’
