काठमाडौं । अमेरिकी दूतावासले स्टेट पार्टनरशिप प्रोग्राम (एसपीपी) मा सामेल हुन कुनै देशले माग गरेमा सामेल गरिने जनाएको छ ।

अमेरिका र नेपालबीच हुन लागेको एसपीपीबारे बहस चर्किएपछि नेपालस्थित अमेरिकी दूताबासले एसपीपी प्रोग्राममा सामेल हुने अमेरिकाले कुनै पनि देशलाई नभन्ने तर कुनै देशबाट माग भएमा त्यसको सम्वोधन गरिने बताएको छ ।
साथै, अमेरिकी दूतावासले नेपाल र अमेरिकाबिच सैन्य सम्झौता भएको दाबी गर्ने केही अनलाइन सञ्चार माध्यममा प्रकाशित दस्ताबेज असत्य भएको दाबी पनि गरेको छ ।

मंगलबार दूताबासले जारी गरेको सन्देशमा भनिएको छ, ‘नेपाल र अमेरिकाबिच सैन्य सम्झौता भएको दाबी गर्ने केही अनलाइन सञ्चार माध्यममा प्रकाशित दस्ताबेज असत्य हो। नीतिअनुसार अमेरिकाले कुनै पनि देशलाई स्टेट पार्टनरशिप प्रोग्राममा सामेल हुन भन्दैन तर कुनै देशबाट त्यसका लागि माग आएको खण्डमा भने त्यस्तो मागको सम्बोधन गर्दछ। अमेरिकी नेशनल गार्डले स्वदेशमा भूकम्प, बाढी र वन डढेलो जस्ता प्राकृतिक विपत विरुद्ध जुध्नका लागि अमेरिकाका प्रथम उद्धारकर्ताहरूलाई सहयोग गर्दछ ।’

अमेरिकी दूतावासले एसपीपीमा ९० भन्दा बढी देशसँग ८० भन्दा बढी साझेदारीहरू समावेश रहेको पनि स्पष्ट पारेको छ ।
सन्देशमा भनिएको छ, ‘२५ वर्षभन्दा लामो समयदेखि कायम रहँदै आएको एसपीपीमा ९० भन्दा बढी देशसँग ८० भन्दा बढी साझेदारीहरू समावेश छन्। तीमध्ये अधिकांश देशहरू यस क्षेत्रमा छैनन्।’

अमेरिकाले सहकार्यमा सहजीकरणका लागि एसपीपी प्रभावकारी माध्यम हो भनेको छ। ‘आँधीबेहरीदेखि भूकम्प, बाढी र डढेलोसम्मका प्राकृतिक तथा अन्य विपद्को अवस्थामा अमेरिका आफ्नो अग्रपंक्तिका उद्धारकर्ताका रूपमा रहेका नेशनल गार्डहरूको उत्कृष्ट अभ्यासको अनुभव तथा क्षमता साटासाट गर्न चाहन्छ। यस प्रकारको सहकार्यको सहजीकरणका लागि एसपीपी प्रभावकारी माध्यम हो’ दूतावासले सन्देशमा भनेको छ ।

नेपाल र अमेरिकाबिच सैन्य सम्झौता भएको दाबी गर्ने केही अनलाइन सञ्चारमाध्यममा प्रकाशित दस्ताबेज असत्य हो। नीतिअनुसार अमेरिकाले कुनै पनि देशलाई स्टेट पार्टनरशिप प्रोग्राममा सामेल हुन भन्दैन तर कुनै देशबाट त्यसका लागि माग आएको खण्डमा भने त्यस्तो मागको सम्बोधन गर्दछ।++

— U.S. Embassy Nepal (@USEmbassyNepal) June 14, 2022