काठमाडौं । राष्ट्रिय जनमोर्चाले आइतबार भएको विमान दुर्घटनाको सत्यतथ्य पत्ता लगाउन माग गरेको छ ।
उपाध्यक्ष एवम् प्रवक्ता दुर्गा पौडेलले मंगलबार विज्ञप्ति प्रकाशित गरी हवाइ दुर्घटनाको कारण पत्ता लगाउन र नेपालको आकाशलाई सुरक्षित बनाउन आवश्यक ध्यान दिन माग गर्नुभएको छ ।
दुर्घटनामा ज्यान गुमाउने चालक दलसहित सम्पूर्ण यात्रुहरुप्रति हार्दिक श्रद्धाञ्जली अर्पण गर्दै राजमोले शोकसन्तप्त परिवारजनप्रति गहिरो समवेदना व्यक्त गरेको छ।
विज्ञप्तिमा भनिएको छ, ‘पोखराबाट जोमसोमका लागि उडान भरेको तारा एयरको ९ एन–एइटी जहाज २०७९ जेठ १५ गते आइतबार मुस्ताङको थासाङमा दुर्घटना हुँदा विमानमा सवार चालकदलका तीन र १९ यात्रुसहित २२ जनाको मृत्यु भएको खबरले स्तब्ध पारेको छ । दुर्घटनामा ज्यान गुमाउने चालक दलसहित सम्पूर्ण यात्रुहरुप्रति हार्दिक श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गर्दछौं ।
जहाज दुर्घटनाले नेपाली हवाई क्षेत्रको सुरक्षाबारे पुनः प्रश्न उठाएको छ । पर्यटनमन्त्री प्रेम आलेबाट नै नेपालमा पुराना जहाज उडाइने गरेको भनाई सार्वजनिक भएको छ । नेपालको आकाशलाई सुरक्षित गर्न सम्पूर्ण पहल गर्नको लागि सरकारको गम्भीर ध्यानाकर्षण गराउँदै दुर्घटनाबारे जाँचबुझ गरी वास्तविकता सार्वजनिक गर्न अनुरोध गर्दछौं ।’
२०७९ जेठ १७ गते
दुर्गा पौडेल
उपाध्यक्ष तथा प्रवक्ता
