काठमाडौं । प्रधानमन्त्री शेरबहादुर देउवाले गठबन्धन भत्काउने षडयन्त्र भएको बताउनुभएको छ । बिहीबार भरतपुरमा आयोजित गठबन्धनको संयुक्त चुनावी सभालाई सम्बोधन गर्दै प्रधानमन्त्री देउवाले गठबन्धन टुट्न दिनु नहुने बताउनुभयो ।
उहाँले हाल रेनु दाहाललाई जिताउनु आफूहरुको कर्तव्य रहेको भन्दै पछि आफूहरुका लागि छोड्न आग्रह गरिने पनि बताउनुभयो । उहाँले भन्नुभयो – ‘एउटा ठुलो षड्यन्त्र छ हेर्नुस्, यो गठबन्धन टुटाउने षड्यन्त्र छ । यो षड्यन्त्रमा फस्यो भने हाम्रो पार्टी पनि खत्तम हुन्छ । उहाँहरुको पनि त्यही हो । कुनैपनि हालतमा यो गठबन्धन टुटाउने षड्यन्त्र भरतपुर चितवनबाट हुन सक्दैन । हुनु हुँदैन । यो कुरा स्पष्ट हुनुस् तपाईहरु । भोली हाम्रो साथीहरुले मौका पाइहाल्थे नि राम्रो काम गर्नुस् न । उहाँलाई पछि छोड्नुस् सहयोग गर्नुस् भनौला नि । उहाँलाई सहयोग गरेर हेर्नुप-यो नि हामीले एकपल्ट । हाम्रो कर्तव्य हो अहिले उहाँलाई जिताउनुपर्ने कर्तव्य ।’
प्रधानमन्त्री देउवाले नेपाली कांग्रेस गठबन्धनको पक्षमा रहेको बताउनुभयो । उहाँले नेपाली कांग्रेसको महाधिवेशनबाट ८२ प्रतिशत मतका साथमा आफु सभापति निर्वाचित भएको स्मरण गर्दै गठबन्धनका प्रति जनताको भरोसाका कारणले नै आफु सभापतिमा निर्वाचित भएको बताउनुभयो । आफ्नो सभापतिमा भएको जित नै गठबन्धन प्रतिको समर्थन रहेको उहाँले जिकिर गर्नुभयो ।
चितवनको भरतपुर महानगरपाकिलामा कांग्रेसकै पुराना नेता जगन्नाथ खतिवडाले गठबन्धनविरुद्ध बागी उम्मेदवारी दिएपछि नेताहरुमा गठबन्धन टुट्ने डर बढेको छ ।
