काठमाडौं । सरकारले गठन गरेको राष्ट्रिय भूमि आयोगमा राष्ट्रिय जनमोर्चाको तर्फबाट केन्द्रसहित विभिन्न जिल्लामा प्रतिनिधित्व भएको छ । केन्द्रीय आयोगमा सदस्यसहित राजमोले तीन जिल्ला अध्यक्ष र कतिपय जिल्लामा सदस्य पाएको छ ।
आयोगका सदस्य एवम् अखिल नेपाल किसान महासंघ (अप्फा) का अध्यक्ष भैरवराज रेग्मी केन्द्रीय आयोगको सदस्य नियुक्त हुनुभएको छ । महासंघकै सिफारिसमा सरकारले बागलुङ, प्युठान र कपिलवस्तुमा राजमो नेताहरुलाई आयोगको अध्यक्ष नियुक्त गरेको छ ।
कपिलवस्तुमा किसान महासंघको केन्द्रीय उपाध्यक्ष शिव पौडेलको नेतृत्वमा आयोगको जिल्ला समिति गठन भएको छ । यसअघि बागलुङमा धर्म कुँवर र प्युठानमा इमानसिंह खड्कालाई सरकारले आयोगको जिल्ला अध्यक्ष नियुक्त गरेको थियो ।
यस्तै, विभिन्न जिल्लामा राजमो नेताहरु सदस्यमा नियुक्त हुनुभएको छ । रुपन्देहीमा बद्रे आलम, नवलपरासीमा भागिरथ भट्टराई, अर्घाखाँचीमा सकुन्तला राना, दाङमा कमला जिसी, कञ्चनपुरमा राजकुमार चौधरी, सुनसरीमा अमृत पाण्डे, भक्तपुरमा शारदा कोजु र पर्सामा अक्षयलाल साह नियुक्त हुनुभएको छ ।
राष्ट्रिय भूमि आयोगमा राजमोको उपस्थितीले देशव्यापी वास्तविम भूमिहीनलाई जग्गा उपलब्ध गराउने र लालपुर्जा दिन पहल हुने आयोगका केन्द्रीय सदस्य भैरवराज रेग्मीले बताउनुभयो ।
युगदर्शनलाई प्रतिक्रिया दिँदै रेग्मीले सुकुम्बासीलाई लालपुर्जा वितरण, अव्यवस्थित बसोबासीलाई व्यवस्थित बनाउने, विवादित गुठीको जग्गाको समस्या हल गर्ने लगायत काम गर्ने बताउनुभयो ।
‘हाम्रो उपस्थितीले लालपुर्जा ठीक ढंगले वितरणको पहल हुन्छ । पाउनुपर्नेलाई लालपुर्जा दिन हामी पहल गर्छौँ’ रेग्मीले भन्नुभयो, ‘जग्गा कब्जा गर्ने भूमाफिया र घुसखोरी नियन्त्रण गर्ने हाम्रो प्रयास रहन्छ ।’
सरकारले गत भदौ ३० गते अध्यक्ष देवी ज्ञवाली नेतृत्वको सुकुम्बासी समस्या समाधान आयोग खारेज गर्दै राष्ट्रिय भूमि आयोग गठन गरेको थियो । आयोगको अध्यक्षमा केशव निरौला र उपाध्यक्षमा नहेन्द्र खड्का रहनुभएको छ ।
*(जिल्ला आयोगमा नियुक्त केही नाम भूलबस फरक परेकोले सच्याइएको छ– सम्पादक ।)
- किसान महासंघका अध्यक्ष रेग्मी राष्ट्रिय भूमि आयोगको सदस्य नियुक्त
- २८ जिल्लामा भूमि आयोगका अध्यक्ष नियुक्त, प्युठानमा इमान, बागलुङमा धर्म
