काठमाडौं । नेपाल कमयुनिष्ट पार्टी (मसाल) ले एमालेसँग चुनावी तालमेल गर्ने पार्टीको नीति नरहेको स्पष्ट पारेको छ ।
प्रवक्ता रामप्रकाश पुरीले मंगलबार एक विज्ञप्ति प्रकाशित गरी एमाले र राजावादीसँग चुनावी तालमेल नगर्ने पार्टीको निर्णय यथावत नै रहेको बताउनुभएको छ ।
२०७८ चैत्र ०८ गते मंगलबारको कान्तिपुर दैनिक ‘मोहनविक्रम सिंह नेतृत्वको नेकपा मसालले भने एमालेसँग चुनावी तालमेल गर्ने निर्णय यसअघि नै गरिसकेको छ’ भन्ने समाचारप्रति पार्टीको ध्यानाकर्षण भएको मसालले जनाएको छ । सो समाचारमा सत्यता नरहेकोले भ्रममा नपर्नसमेत आग्रह गरिएको छ ।
साथै, मसालले आफ्नो धारणा यसअघि नै स्पष्ट पारिसकेको सन्दर्भमा कान्तिपुरमा प्रकाशित समाचारको स्रोत के हो भनी प्रश्न गरेको छ।
वक्तव्यमा भनिएको छ :
‘२०७८ चैत्र ०८ गते मंगलबारको कान्तिपुर दैनिकको पृष्ठ ३ मा प्रकाशित चुनावी तालमेलको विकल्पमा एमाले खुला शीर्षकको समाचारप्रति हाम्रो पार्टीको गम्भीर ध्यान आकर्षित भएको छ । उक्त समाचारको अनुच्छेद २ मा “मोहनविक्रम सिंह नेतृत्वको नेकपा मसालले भने एमालेसँग चुनावी तालमेल गर्ने निर्णय यसअघि नै गरिसकेको छ” भन्ने कुरा उल्लेख गरिएको छ ।
वर्तमान स्थितिमा एमालेसँग चुनावी तालमेल नगर्ने नीति रहेको कुरा हामीले पहिले नै स्पष्ष्ट गरिसकेका छौँ । त्यो नीति अहिले पनि कायम रहेको छ । उक्त नीति सम्बन्धी विभिन्न समयमा हाम्रो पार्टीका आधिकारिक धारणा सार्वजनिक हुँदै आएका छन् । चुनाव जस्तो विषयमा के–कस्तो नीति बनाउने भन्ने विषयमा हाम्रो पार्टीले आफ्नो धारणा सार्वजनिक गरेर नै अगाडि बढेको इतिहास छ र अहिलेको सन्दर्भमा पनि त्यही कुरा सत्य हो ।
गत माघ महिनामा सम्पन्न केन्द्रीय समितिको बैठकद्वारा पारित तात्कालिक राजनीतिक प्रस्तावमा समेत एमाले र राजावादीसित अहिलेको राजनीतिक परिस्थितिमा तालमेल नगर्ने भन्ने कुरा उल्लेख भइसकेको छ । त्यसका साथै त्यो बैठकले स्थानीय चुनावमा एमाले र राजावादीहरूसँग चुनावी तालमेल नगर्ने भनी गरेको निर्णयलाई पार्टीका आधिकारिक वक्तव्यहरूमा सार्वजनिक गरिसकिएको छ ।
त्यसरी पार्टीले गरेको निर्णयलाई आम रुपमा लागू गरिदै गरिएको सन्दर्भमा कान्तिपुरमा प्रकाशित समाचारले भ्रम पैदा गरेको छ । उक्त समाचार असत्य र झुट भएको कुरा पनि स्पष्ट गर्न चाहन्छौँ । त्यसैले “मसालले एमालेसँग चुनावी तालमेल गर्ने निर्णय गरिसकेको” भन्ने समाचारको स्रोत के हो ? त्यसबारे आवश्यक छानवीन गरी सम्बन्धित पत्रीका वा पक्षले त्यस सम्बन्धी स्पष्ट गर्नका लागि ध्यान आकर्षण गर्दछौँ ।’
मिति :२०७८ चैत्र ८ गते
रामप्रकाश पुरी
प्रवक्ता
