बुटवल । राष्ट्रिय जनमोर्चाकी उपाध्यक्ष तथा सांसद दुर्गा पौडेलले प्रतिगमनको खतरा कामयै रहेको बर्तमान अवस्थामा जनमोर्चाले संघर्ष एकता संर्घषको नीति अवलम्बन गर्दै स्थानीय निर्वाचनमा चुनावी तालमेल गर्ने कुरालाई प्राथमिकतामा राखेको बताउनु भएको छ ।
उपाध्यक्ष पौडेलले शनिवार राष्ट्रिय जनमोर्चा बुटवल उपमहानगरपालिकाको नगर भेलालाई सम्बोधन गर्दै ५ दलीय गठबन्धनमा आफ्नो पार्टी नरहेको अबस्थामा पनि प्रतिगमनको खतरा रोक्न चुनावी मोर्चालाई सधैँ खुल्ला राखेको धारणा राख्नु भयो । उहाले राष्ट्रीयता, गणतन्त्र र धर्मनिरपेक्षतालाई खारेज गर्ने उद्देश्यले भैरहेका प्रतिगमनकारी शक्तिलाई परास्त गर्दै संविधानको रक्षा गर्नु अहिलेको प्रमुख राजनीतिक मुद्दा बन्नु पर्ने कुरामा जोड दिनु भयो ।
पौडेलले एमसीसी जस्तो राष्ट्रघाती सम्झौतालाई वर्तमान सरकारले संसदबाट जालझेल गरी पारित गरेकोप्रति विमति जाहेर गर्दै यो मुद्दालाई स्थानीय निर्वाचनमा जनताको माझमा पु¥याउने दायित्व आफ्नो पार्टीको काँधमा आएको जिकिर गर्नु भयो ।
उहाँले निर्वाचनमा उच्च मनोबलका साथ जनतामा जान नेता कार्यकर्तालाई आग्रह गर्दै आगामी स्थानीय निर्वाचनलाई प्रतिगमनविरुद्धको संघर्षकै रुपमा उपयोग गर्नुपर्नेमा जोड दिनुभयो । उहाँले अझै पनि प्रतिगमन खतरा रहेकोले प्रतिगामी शक्तिसँगै राष्ट्रघाती एमसीसी सम्झौता र संघीयता खारेजीको मुद्दा पार्टीको चुनावी नारा हुने बताउनु भएको थियो ।
राजमोका नगर अध्यक्ष पदमप्रसाद श्रेष्ठको अध्यक्षता सचिव गंगालाल सापकोटाको सञ्चालन तथा उपाध्यक्ष केपी पोखरेललको स्वागतमा भएको कार्यक्रममा चेतनाथ आचार्य, दुर्गा खरेल, ढुण्डीराज शर्मा, टानबहादुर केसी लगायत बोल्नु भएको थियो ।
भेलाले आगामी स्थानीय निर्वाचन लक्षित १५ दिने प्रारम्भिक कार्यक्रम तय गरेको छ । जसमा वडा भेलाहरु, कार्यकर्ता प्रशिक्षण तथा उम्मेदवार छनौट प्रक्रियाहरुको थालनी गर्ने जनाइएको छ । त्यस अवसरमा अन्य दलहरुसँगको छलफललाई पनि अगाडि बढाउने निर्णय भएको छ । भेलाले निर्वाचन परिचालन समिति, प्रचारप्रसार तथा आर्थिक व्यवस्थापन समिति पनि गठन गरिएको सो पार्टीले जनाएको छ ।
