काठमाडौं । संसदबाट पारित विवादित अमेरिकी सहायता परियोजना एमसीसी खारेजीको माग गर्दै आज काठमाडौंमा विशाल जनसभाको आयोजना गरिएको छ ।
नेकपा (मसाल) सहित विभिन्न ६ राजनीतिक दल तथा दुई मोर्चाको आयोजनामा हुन लागेको सभा अघि राजधानीका विभिन्न स्थानबाट जुलुश निस्कनेछ ।
खुलामञ्चमा हुने जनसभालाई राष्ट्रिय जनमोर्चाका अध्यक्ष चित्रबहादुर केसी लगायत नेताहरुले सम्बोधन गर्ने कार्यक्रम छ ।
नेकपा (क्रान्तिकारी माओवादी) का महासचिव मोहन वैद्य किरणको अध्यक्षतामा हुने विरोधसभाको सञ्चालन नेपाल कम्युनिस्ट पार्टी प्रवक्ता खड्गबहादुर विश्वकर्मा प्रकाण्डले गर्ने तय भएको छ ।
सभालाई देशभक्त जनगणतान्त्रिक मोर्चा, नेपालका अध्यक्ष सीपी गजुरेल, नेपाल कम्युनिस्ट पार्टीका महासचिव नेत्रविक्रम चन्द विप्लव, नेकपा (मसाल) का प्रवक्ता रामप्रकाश पुरी, नेकपाका अध्यक्ष ऋषि कट्टेल, वैज्ञानिक समाजवादी कम्युनिस्ट पार्टीका संयोजक विश्वभक्त दुलाल आहुति, नेकपा (माओवादी केन्द्र समाजवा) का कर्णजीत बुढाथोकी लगायतका नेताहरुले सम्बोधन गर्नुहुनेछ ।
विरोधसभा सुरु हुनुअघि उपत्यकाका त्रिपुरेश्वर, माइतीघर मण्डला र दरबारमार्गबाट १ बजे ¥याली निकालिने र ¥याली रत्नपार्कस्थित सहिद मञ्चमा पुगेपछि २ बजे सभाको सुरुवात हुने जनाएको छ । विरोधसभामा रक्तिम सांस्कृतिक परिवार, सामना साँस्कृतिक परिवार लगायतका कलाकारहरुले क्रान्तिकारी गीत तथा नृत्य प्रस्तुत गर्ने समेत कार्यक्रम रहेको छ ।
विरोधसभामा अन्य पार्टीभित्रका एमसीसीको विरोधमा रहेका नेताहरुलाई समेत निम्तो गरिएको छ । नेकपा (एकीकृत समाजवादी) का सम्मानित नेता झलनाथ खनाल, नेकपा (एमाले) का नेता भीम रावल, नेकपा (माओवादी केन्द्र)कावरिष्ठ नेता नारायणकाजी श्रेष्ठ, नेपाल मजदुर किसान पार्टीका नेता नारायणमान विजुक्छे रोहितलाई कार्यक्रममा निम्तो गरिएको नेकपा (मसाल) केन्द्रीय कार्यालयले जनाएको छ ।
हालै सदनबाट राष्ट्रघाती एमसीसी सम्झौता पारित गरेपछि लामो समयदेखि एमसीसी सम्झौता खारेजीका लागि संघर्ष गर्दै आएका आठ दलले एमसीसीका विरुद्ध चरणबद्ध रुपमा संघर्षका कार्यक्रम घोषणा गरेका छन् ।
