काठमाडौं । विवादित अमेरिकी सहायता परियोजना (एमसीसी) संसदबाट पास भएको विरोधमा आज (सोमबार) आयोजित नेपाल बन्दका क्रममा देशका विभिन्न स्थानबाट नेता कार्यकर्ताहरु पक्राउ परेका छन् ।
शान्तिपूर्णरुपमा बन्द आह्वान गरिरहेका नेता कार्यकर्तालाई प्रहरीले गिरफ्तार गरी बन्द असफल पार्न प्रयत्न गरेपनि देशका अधिकांश स्थानमा स्वतःस्फूर्त बन्द भएको छ ।
काठमाडौंको धुम्बाराहीबाट राष्ट्रियय जनमोर्चाका जिल्ला सचिव छवि खनाल, अखिल (छैठौं) का पूर्वअध्यक्ष विमल पोखरेल, राजमो नेताहरु हरिकान्त शर्मा, मदन पाण्डे गिरफ्तार हुनुभएको छ । गिरफ्तार नेता कार्यकर्तालाई महाराजगञ्ज प्रहरी प्रभागमा राखिएको छ ।
यस्तै, पोखराको पृथ्वीचोकबाट राजमो नेता मोहन थापा, अखिल (छैठौं) का जिल्ला अध्यक्ष सोमनाथ अधिकारी, ऋषि कट्टेल नेतृत्वको विद्यार्थी संगठनका नेता मनिष भट्टराई गिरफ्तारीमा पर्नुभएको छ ।
पोखरामा अहिले नारा जुलुश भइरहेको छ भने बन्दको पूर्ण प्रभाव परेको अखिल (छैठौं) का केन्द्रीय उपाध्यक्ष गणेश अधिकारीले बताउनुभएको छ ।
यस्तै, सुर्खेतमा बन्दको पूर्ण प्रभाव परेको छ । बजार, पसल, कलकारखाना, उद्योग धन्दा, शिक्षण संस्था ठप्प भएका छन् ।
यता, सुदूरपश्चिममा बन्दको पूर्ण असर परेको छ । महेन्द्रनगरमा बन्दका क्रममा प्रहरीसँग झडप हुँदा दुई जना घाइते भएका छन् ।
यस्तै, प्युठानमा पनि बन्दको प्रभाव परेको छ । राष्ट्रिय जनमोर्चालगायत राजनीतिक दलका नेता कार्यकर्ताहरु अहिले बन्द आह्वान गर्दै हिँडेका छन् । बन्दलाई स्थानीय जनताको पूर्ण साथ र समर्थन देखिएको छ ।
धनगढीमा पनि बन्दको प्रभाव परेको छ । त्यहाँ अहिले आठ राजनीतिक दलका नेता कार्यकर्ताहरुले सडकमा टायर बालेर प्रदर्शन गरिरहेका छन् ।
नेकपा (मसाल), राष्ट्रिय जनमोर्चा, विप्लव नेतृत्वको नेकपा, वैद्य नेतृत्वको नेकपा (क्रान्तिकारी माओवादी) लगायत दलले आज नेपाल बन्दको आह्वान गरेका हुन् ।
