नवलपरासी । नेकपा (मसाल) सहित विभिन्न आठ राजनीतिक दलहरूले नवलपरासी जिल्लाको जिल्ला प्रशासन कार्यालयमा धर्ना दिएका छन् । एमसीसीविरुद्ध आन्दोलनरत दलहरुले देशहब्यापी कार्यक्रम अन्तर्गत प्रशासनमा धर्ना दिएका हुन् ।
परासी बजारको हाटबजार चोकबाट नारा जुलुस गर्दै जिल्ला प्रशासन कार्यालयमा गई धर्नामा परिणत भएको थियो ।
सो कार्यक्रममा राष्ट्रिय जनमोर्चा नवलपरासी जिल्ला सल्लाहकार तथा रक्तिम सांस्कृतिक अभियानका अध्यक्ष रेम रानाले सम्बोधन गर्दै राष्ट्रघाती एमसीसी सम्झौता अमेरिकी साम्राज्यवादको स्वार्थ सिद्ध गर्न, त्यसका मतियारहरुले देशलाई दाउमा राखेर ल्याएको हुनाले खारेज गर्नुपर्नेमा जोड दिनुभयो ।
कार्यक्रममा नेपाल कम्युनिस्ट पार्टी (मसाल) का जिल्ला प्रवक्ता धनपति सापकोटाले जनदबाबले मात्र राष्ट्रघाती एमसीसी खारेज हुने हुँदा सम्पूर्ण देशभक्त सडकमा आउनुपर्नेमा जोड दिनुभएको थियोे ।
कार्यक्रमलाई देजमोका चुडामणिा भण्डारी, नेकपा विप्लवका रामपिरित हरिजन, नेकपा क्रान्तिकारी माओवादीका क्षेत्र बहादुर थापाले सम्बोधन गर्नुभएको थियोे । कार्यक्रम कृतिले सञ्चालन गर्नुभएको थियोे ।
रूपन्देहीमा पनि प्रशासन घेराउ
एमसीसी खारेजीको माग गर्दै रूपन्देही जिल्ला प्रशासन कार्यालय अगाडि पनि धर्ना दिइएको छ । आठ राजनीतिक संगठनको आयोजनामा जिल्ला प्रशासन कार्यालय अगाडि एक घण्टा धर्ना दिइएको हो।
विभिन्न गगनभेदी नाराहरुसहित शुरू भएको धर्ना तथा विरोध कार्यक्रममा राष्ट्रिय जनमोर्चा सिद्दार्थनगर नगर समितिका सदस्य रामलाल दामी, नेकपाका जिल्ला सेक्रटरी विस्वास, नेकपा माओवादी केन्द्र समाजवादीका केन्द्रीय उपाध्यक्ष विनोद उपाध्याय र नेकपा क्रान्तिकारी माओवादीका पिविएम प्रेम सुवेदीले सम्बोधन गर्नुभएको थियो ।
