काठमाडौं । नेत्रविक्रम चन्द ‘विप्लव’ नेतृत्वको नेकपाका कार्यकर्ताले तोकिएको जति चन्दा नदिएको भन्दै प्युठानको मल्लरानी गाउँपालिकाका अध्यक्ष अमरध्वज रानालाई कालोमोसो दलेका छन् । राष्ट्रिय जनमोर्चाबाट निर्वाचित गाउँपालिका अध्यक्ष रानालाई २/३ जनाको समूहमा आएका विप्लव कार्यकर्ताले एक्कासी मोसो दलेर फरार भएका थिए ।

मल्लरानी गाउँपालिका–५ सरङकोटस्थित भूमि विकास आधारभूत विद्यालयको पठनपाठनमा सहजीकरण गर्नका लागि छलफल चलिलरहेका बेला एक्कासि नेकपा विप्लव समूहका कार्यकर्ताहरूले आतङ्क सिर्जना गर्दै पालिका अध्यक्ष अमरध्वज राना, प्रमुख प्रशासकीय अधिकृत बालकृष्ण थापा, शिक्षा शाखा प्रमुख ठाकुर आचार्य र शिक्षा विकास तथा समन्वय एकाइ प्युठानका एकाइ प्रमुख शिवराज पण्डितलाई कालो मोसो दलेका थिए ।

राजमो प्युठानद्वारा भर्त्सना
तोकिएको चन्दा नदिएको नाममा गाउँपालिका अध्यक्षसहितका कर्मचारीलाई नेकपा विप्लव समूहले कालो मोसो दलेपछि राष्ट्रिय जनमोर्चा प्युठानले त्यसको भत्र्सना गरेको छ । त्यसका साथै राजमो प्युठानले विप्लव पक्षलाई उक्त कार्य तत्कालै रोक्न चेतावनीसमेत दिएको छ । राजमो प्युठानका अध्यक्ष कृष्णबहादुर खड्काको हस्ताक्षरमा २०७८ फागुन ९ गते जारी प्रेसवक्तव्यमा यस्तो चेतावनी दिइएको हो ।

यस्तो प्रेसवक्तव्यको पूर्ण पाठ :
“हाम्रो पार्टी राष्ट्रिय जनमोर्चाका जिल्ला सदस्य, अखिल नेपाल जनजाति सम्मेलनका महासचिव एवम् हाम्रो पार्टीको तर्फबाट मल्लरानी गाउँपालिकाको अध्यक्ष पदमा निर्वाचित कमरेड अमरध्वज रानासमेतलाई नेकपा विप्लव समूहले आज दिउसो हातपात गर्दै कालो मोसो दलेको घटनाप्रति हाम्रो पार्टीको गम्भीर ध्यान आकर्षण भएको छ ।

विप्लव समूहले विभिन्न निराधार र कपोलकल्पित आरोप लगाउँदै निज समूहले तोकेको चन्दा नदिएकोमा पूर्वाग्रह साधी क। अमरध्वज रानासमेत मल्लरानी गाउँपालिकाका प्रमुख प्रशासकीय अधिकृत बालकृष्ण थापा, शिक्षा शाखा प्रमुख ठाकुर आचार्य र शिक्षा विकास तथा समन्वय एकाइ प्युठानका एकाइ प्रमुख शिवराज पण्डितलाई कालो मोसो दल्ने कार्य भएको छ । सो कार्यको हामी घोर निन्दा गर्न चाहान्छौँ ।

प्युठान जिल्ला मल्लरानी गाउापालिका–५ सरङकोटमा रहेको भूमि विकास आधारभूत विद्यालयको पठनपाठन सहजीकरणका लागि मल्लरानी गाउँपालिकाका अध्यक्ष, प्रमुख प्रशासकीय अधिकृत, शिक्षा शाखा प्रमुख, शिक्षा विकास तथा समन्वय एकाइ प्रमुख, विभिन्न शिक्षक सङ्गठनका प्रतिनिधि, सो विद्यालयका शिक्षक, विद्यालय व्यवस्थापन समितिका पदाधिकारी र आम अभिभावकको उपस्थितिमा छलफल भइरहेको समयमा विप्लव समूहले आतङ्क सृजना गरी हाम्रो पार्टीका जिम्मेवार व्यक्ति र कर्मचारीमाथि कालो मोसो दली अपमानजनक र अमानवीय कार्य गरेको छ ।

उक्त कार्य नेकपा विप्लव समूहको जिल्लाको योजना र निर्देशनमा नै भएको कुरा निज समूहको जिल्ला समितिले निकालेको वक्तव्यबाट प्रष्ट भएको छ । मिलेनियम च्यालेन्ज कर्पोरेसनको विरुद्ध आन्दोलन चलिरहेको र सो आन्दोलनमा कार्यगत एकता गरी आन्दोलन गरिरहेको सहयात्री दलबाटै झुटा आरोप लगाउँदै हाम्रा नेतामाथि भएको आक्रमण अत्यन्तै दुखद, निन्दनीय एवम् भत्र्सनायोग्य रहेको छ । नेकपा विप्लव समूहको उक्त गलत कार्यप्रति हामी खेद प्रकट गर्दै आफ्ना गलत कार्य तत्काल रोक्न हामी चेतावनी दिन चाहन्छौँ ।”

अखिल (छैठौं) र युवक संघद्वारा चेतावनी
तोकिएको चन्दा नदिएकोमा प्युठान मल्लरानी गाउँपालिकामा राष्ट्रिय जनमोर्चाका निर्वाचित अध्यक्षसहितलाई कालो मोसो दलेको विषयमा अखिल (छैठौं) जिल्ला समिति र अखिल नेपाल युवक सङ्घ झिमरुक गाउँ समितिले भत्र्सना गरेका छन् । अखिल (छैठौं) प्युठानका अध्यक्ष नवीन केसी र युवक सङ्घ झिमरुकका अध्यक्ष भरत ढकालले २०७८ फागुन ९ गते नै प्रेसवक्तव्य जारी गर्दै विरोध गरेका हुन् ।

“आज मल्लरानी गाउँपालिकाका अध्यक्ष अमरध्वज रानालाई विप्लव समूहका कार्यकर्ता बताउने २/३ जना लठैतहरूले चन्दा नदिएको आरोपमा गरेको दुव्र्यवहारप्रति अखिल (छैठौं) जिल्ला समिति प्युठानको गम्भीर ध्यान आकर्षण भएको छ” अखिल (छैठौं) जिल्ला समितिको वक्तव्यमा भनिएको छ– “शैक्षिक संस्थाभित्र पसेर विद्यार्थीलाई तर्साउने, शिक्षक, अभिभावकलाई धम्काउने, डाँका र गुन्डागर्दी शैलीमा स्कुलमा आतङ्क मच्चाउने विप्लव माओवादी कार्यकर्ताको हामीले घोर भत्र्सना गर्दै अपराधीलाई तुरुन्त पक्राउ गरी कारबाही गर्न प्रशासनसित हार्दिक अनुरोध गर्दछौँ ।”

वक्तव्यमा अगाडि भनिएको छ– “यस प्रकारका गतिविधि तुरुन्त रोकी शैक्षिक स्थलमा भएको उक्त अपराधिक घटनाको माफी नमागे अखिल (छैठौं) ले विरोधका कार्यक्रम सार्वजनिक गर्ने चेतावनी पनि दिन चाहान्छौँ ।”

त्यस्तै, अखिल नेपाल युवक सङ्घ झिमरुकको वक्तव्यमा भनिएको छ– “हामीले उक्त घटनाको घोर भत्र्सना गर्दै अपराधीलाई तुरुन्त पक्राउ गरी कारबाही गर्न प्रहरी प्रशासनसित हार्दिक अनुरोध गर्दछौँ ।”