काठमाडौँ । नेपाली जनता रैतीबाट नागरिक घोषणा भएको ऐतिहासिक दिनका अवसरमा सैनिक मञ्च टुँडिखेलमा २०७८ फागुन ७ गते शनिबार विशेष समारोहको आयोजना गरी राष्ट्रिय प्रजातन्त्र दिवस–२०७८ मनाइएको छ ।
राष्ट्रिय प्रजातन्त्र दिवस–२०७८ मूल समारोह समितिको आयोजनामा सम्पन्न सो समारोहमा राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री शेरबहादुर देउवा, कायममुकाम प्रधान न्यायाधीश दीपककुमार कार्की, प्रतिनिधि सभाका सभामुख अग्निप्रसाद सापकोटा, मन्त्रीगण, उच्चपदस्थ कर्मचारीलगायतको सहभागिता थियो ।
समारोहलाई उत्सवमय तुल्याउन नेपाली सेनाले राष्ट्रिय प्रजातन्त्र दिवस–२०७८ ब्यानर अङ्कित दुईओटा हेलिकोप्टरबाट पृष्पवृष्टि गराएको थियो भने मैदानबाट शान्तिका दूत परेवा र रङ्गीचङ्गी बेलुन उडाइएको थियो ।
कार्यक्रममा नेपाली सेना, नेपाल प्रहरी र सशस्त्र प्रहरी बलबाट मार्चपासका साथै “यो नेपाली शीर उचाली” सहित देशप्रेमले भरिपूर्ण कालजयी राष्ट्रिय गीतका धुन र ब्यान्ड प्रस्तुत गरिएको थियो ।
समारोहलाई प्रधानमन्त्री शेरबहादुर देउवाले सम्बोधन गर्नुभएको थियो । (रासस)
