सम्माननीय सभामुखज्यू,
१. आज हुन थालिरहेको प्रतिनिधिसभाको यो बैठकको लागि मैले धेरै नै प्रशन्नता प्रकट गर्दछु । लामो समय पछि यो बैठक हुन थालिरहेको छ । लोकतन्त्रको मूल भनेको प्रतिनिधि सभा नै हो । जनताले आफ्ना प्रतिनिधिहरु चुनेर प्रतिनिधि सभामा पठाउँछन् । प्रतिनिधि सभा नै नियमित भएन भने लोकतन्त्रको आधार नै समाप्त हुन्छ । त्यसकारण विभिन्न दलहरुका बीचमा जे जति मतभेद भए पनि प्रतिनिधि सभालाई सुचारु राख्नु हामी सबैको कर्तव्य हुन्छ र त्यसका लागि मैले सबै माननीय सदस्यहरुको ध्यान आकर्षित गर्न चाहन्छु ।
२. एमसीसीको प्रश्न अहिले देशको गम्भीर राजनीतिक विवादको प्रश्न भएको छ । यो प्रश्नमा हुने कुनै पनि गलत निर्णयबाट देशका वृहत्तर र दीर्घकालीन हितमाथि गम्भीर कुठाराघात पुुग्नेछ । त्यसैले यसबारे दुरदर्षितापूर्वक र सन्तुलित प्रकारले विचार र निर्णय गर्नुपर्ने आवश्यकतामा हाम्रो पार्टीले सवै माननीयहरु तथा सरकारको समेत ध्यानआकर्षित गर्न चाहन्छ ।
३. अमेरिकाका कैयौँ उच्चअधिकारीहरुले समेत एमसीसी इण्डोप्यासिफिक रणनीतिको अंग भएको कुरा स्वीकार गरिसकेका छन् । प्रकट रुपमा एमसीसी विकासको कार्यक्रम हो । तर त्यसको मुख्य उद्देश्य इण्डोप्यासिफिक रणनीतिको सेवा गर्नु नै हो ।
४. एमसीसीलाई संसदद्वारा पारित गरिएमा त्यसका कैयौँ दुष्परिणामहरु हुने कुरा निश्चित छ । नेपालले लामो समयदेखि असंलग्न परराष्ट्र नीति अपनाउँदै आएको छ । एमसीसीलाई स्वीकार गर्नुको परिणाम अमेरिकाको सैनिक क्याम्पमा सामेल हुनु हुनेछ र त्यसरी नेपालको असंलग्न परराष्ट्र नीतिमा कुठाराघात पुग्नेछ ।
५. चीन र भारत हाम्रो छिमेकीमित्र देश हुन् । हामीले ती दुवै मध्यै कुनै पनि देशका विरुद्ध युद्धमा सामेल हुनु नेपालका लागि घातक परिणामहरु हुनेछन् । एमसीसीको उद्देश्य चीनका विरुद्धको मोर्चाबन्दीमा हिन्द प्रशान्त क्षेत्रका अन्य देशहरुका साथै नेपाललाई पनि सामेल गराउनु हो । त्यसैले एमसीसीलाई स्वीकार गर्नुको परिणामस्वरुप नेपाल अमेरिकाको शैन्य अखडामा बदलिनेछ र नेपाल शितयुद्धको केन्द्र बन्न जानेछ ।
६. पाँच दलीय गठबन्धनले एमसीसीलाई आफ्नो न्युनतम कार्यक्रमा सामेल गरेको थिएन र त्यसपछि अमेरिकाले लगातार त्यसलाई पारित गराउनका लागि सरकार माथि दवाव दिइरहेको छ । त्यसका पछाडिको उद्देश्य नेपालको हित नभएर आफ्ना साम्राज्यवादी रणनैतिक स्वार्थको पूर्ति नै हो ।
७. उपरोक्त सबै कुराहरु माथि ध्यान दिँदै एमसीसीलाई संसदद्वारा पारित गराउने कुनै पनि प्रस्ताव संसदमा प्रस्तुत नगर्नको लागि अनुरोध गर्दै प्रतिनिधि सभाका सबै माननीय सदस्यहरुसित पनि त्यसप्रकारका कुनै प्रस्तावका विरुद्ध दृढतापूर्वक अस्वीकार गर्नका लागि अपील गर्दछु ।
८. सम्बन्धित सबै कुराहरु मथि विचार गर्दा देशमा प्रतिगमनको अझै पनि गम्भीर खतरा रहेको कुरा स्पष्ट छ । पाँच दलीय गठबन्धनले नै प्रतिगमनलाई पराजित गरेको थियो । अझै पनि प्रतिगमनको खतरा विद्यमान रहेकोले पाँच दलीय गठबन्धनलाई निरन्तरता दिनुपर्ने आवश्यकतामा हाम्रो पार्टीले विशेष जोड दिन चहान्छ । त्यसैले नै हामीहरु देशलाई प्रतिगमन र अधिनायकवादको खतराको दिशामा जानबाट रोक्न सफल हुनेछौँ र रोक्नु पनि पर्दछ ।
(२०७८ पुस ६ गते बसेको प्रतिनिधि सभा बैठकमा राष्ट्रिय जनमोर्चाका सांसद दुर्गा पौडेलले प्रस्तुत गर्न लैजानुभएको लिखित मन्तव्य । प्रमुख प्रतिपक्षी दल एमालेको अवरोधका कारण उहाँले बोल्न पाउनुभएन ।)
